Billa Kabootar Kha Gaya
بلّا کبوتر کھا گیا
ٹی وی دیکھ کے لگتا ہے کہ وہ سارے گونگے لوگ جو مدتوں سے کچھ بولنے سے قاصر تھے اچانک گویائی ملنے پر بولنے لگے ہیں۔ بولنے پر آئے ہیں تو یہ سمجھ نہیں پارہے کہ بولیں تو کیا بولیں؟ لہٰذا انہوں نے زبان سے وہ سب کچھ اُگلنا شروع کردیا ہے جو حلق تر کرے اور ہونٹوں کی سکت میں ہے۔
جون ایلیا نے ایک جگہ لکھا تھا کہ فاقہ کشوں کی بستی میں جو آدمی موٹا تازہ دکھائی دے اُس کا وجود ساری بستی کے لئے باعث ِ شرم ہے۔ یہاں جو آدمی فربہ ہے اُس نے ضرور کسی اکڑے جسم والے کا حق مارا ہے اور جو اکڑے جسم والا ہے اُس نے کسی لاغر کا پیٹ کاٹا ہے۔ جو لاغر ہے اُس نے ضرور کسی ناتواں کے سامنے سے روٹی کا ٹکڑا اُٹھا کرکھایا ہے۔ اور جو ناتواں ہے وہ ضرور کسی کفن چور کی خیرات پر زندہ ہے۔
ہم اُن بیماروں کی بستی میں رہتے ہیں جو یہ نہیں جان سکے کہ اُن کا مرض کیا ہے۔ عجیب افتاد ہے کہ ہم جب اونچے اُٹھے تو نیچے بہت نیچے چھلانگ لگانے کیلئے۔ جب زمانے سے مہلت پائی تو اپنے ہی خلاف سازش اور آپس میں ہی دراندازی میں مصروف ہوگئے۔ جو کچھ سوچا گیا ہے وہ بری طرح سوچاگیا ہے۔ تب ہی جو کچھ ہورہا ہے وہ بری طرح ہورہا ہے۔ کیا اس بستی میں کوئی اچھی خبر، کیا کوئی نوید کی کرن بھی کہیں نظر آتی ہے۔
امریکی اور اطالوی نژاد ریسٹورنٹس میں کھانا تناول کرتے صاحب ثروت لوگوں کے لئے خوش خبری ہے کہ اُس خوبصورت ماحول سے باہر پائے جانے والے بھوکے لوگوں کو اپنی بھوک کا احساس ختم ہوچکا ہے۔ وہ پیٹ پر پتھر باندھ کر سوچکے ہیں یا شاید اپنے بچوں کو قتل کرکے خود کشیاں کرچکے ہیں۔ تاریخ کے ایسے ظالم ادوار میں ایک ایسا مرحلہ آتا ہے جب مظلوم اپنی برسوں پرانی حالتوں پر اتنے دل برداشتہ ہوجاتے ہیں کہ مطمئن نظر آتے ہیں۔ ایسے ہی کچھ مرحلے ہماری بستی پر بھی گزر رہے ہیں۔
کچھ سجھ نہیں آتا کہ کون کس کے حق میں بول رہا ہے کس کو کس سے شکایت ہے۔ اِس قدر اندھیرا ہے کہ علم ہی نہیں ہوتا کہ کس کا گریبان کس کے ہاتھ میں ہے۔ یہ شور شرابہ شاید اسی لیے ہے بھوکا اپنی بھوک اور حاجت مند اپنی حاجت ہی بھول جائے اور تماشہ دیکھنے میں لگارہے۔ سارا دن اور ساری رات تماشہ دیکھنے میں محو ہو رہے۔ یہی ہم سب کا حال ہے۔ دولت مندوں کے لئے خوش خبری ہے کہ حاجت مندوں نے بھنگ پی لی ہے۔ وہ اب اپنی حاجتوں سے بے پرواہ ہوچکے ہیں۔
ایک غریب لیکن ہنرمند مصور نے ایک کبوتر کی بہت خوبصورت تصویر بنائی کونے پر اپنا نام لکھا اور بازار میں رکھ دی۔ ایک امیر آدمی بازار سے گزرا۔ اُس کو وہ تصویربہت پسند آئی۔ اُس نے اپنی کار رکوائی۔ اُترا اور مصور سے پوچھا کہ اس تصویر کی قیمت کیا ہے۔ مصور نے جو قیمت بتائی اُس نے اُس سے دُگنی ادا کی اور کہا اِس پر اپنا نام ہٹا کر میرا لکھ دو۔ مصور نے خوشی خوشی اپنا نام مٹا کر امیر آدمی کا نام خوش خط لکھ دیا۔ امیر شخص گرمی سے گھبرا کر گاڑی میں آ کر بیٹھ گیا۔
جلد ہی وہ مصور اخبار میں لپیٹ کر تصویر لایا اور امیر آدمی کے حوالے کردی۔ امیر آدمی اُس تصویر کو گھر لایا اور نوکر کو حکم دیا کہ کھول کر ڈرائنگ روم میں لگادو۔ کچھ دیر میں وہ ڈرائنگ روم میں گیا تو کبوتر کی خوبصورت تصویر کہیں نہیں نظر آئی۔ غصہ سے لال پیلا ہو کر نوکر کو بلایا۔ تصویر کا پوچھانوکر نے ایک تصویر کی طرف اشارہ کیاجس پر ایک خونخوار سی موٹا سا بلّا بنا ہوا تھا۔ وہ سمجھ گیا کہ مصور نے اُس کو دھوکہ دیا ہوگا۔ اُس نے تصویر لی او ر واپس گیا ڈانٹ کر مصور سے پوچھا کہ کبوتر والی تصویر کہاں گئی۔ مصور نے غور سے تصویر دیکھی اور مصومیت سے بولا"حضور یہ تصویر وہی والی ہے دراصل یہ بلّا کبوتر کھا گیا ہے" وہ دیکھئے زمین پر کبوتر کا خون بھی نظر آرہا ہے۔
