Apni Jaron Se Miliye

اپنی جڑوں سے ملیے

کیگن جیسپر ک کے تیار کردہ ماڈل میں آپ نے لیف پیپل اور برانچ پیپل سے مل لیا تو اب روٹ پیپل، سے ملیے۔ روٹ پیپل کا تصور زندگی کے ان گہرے اور مضبوط رشتوں کو بیان کرتا ہے جو کسی کی شخصیت کی بنیاد بنتے ہیں۔ آپ کی زندگی کے روٹ پیپل کون لوگ ہیں؟ آنکھیں بند کرکے اپنی زندگی پر اثر انداز ہونے والے دس لوگوں کے بارے میں سوچیں اور آپ ان لوگوں تک پہنچ جائیں گے جو آپ کی زندگی کی جڑ ہیں۔

روٹ پیپل وہ لوگ ہوتے ہیں جن پر کسی کی زندگی کے ہر مرحلے میں بھروسہ کیا جا سکتا ہے۔ ان کی موجودگی میں نہ صرف اعتماد کی فضا قائم ہوتی ہے بلکہ محبت، معاونت، اور سلامتی کا احساس بھی ہوتا ہے۔ ایسے لوگ اپنے دوستوں یا خاندان کے افراد کے ساتھ دیرپا رشتے استوار کرنے کے لیے پوری وفاداری اور اخلاص سے کام لیتے ہیں۔

وہ اپنے تجربات اور معلومات کا اشتراک کرکے دوسروں کی رہنمائی کرتے ہیں، خصوصاً جب کوئی بڑا فیصلہ کرنا ہو۔ یہ جذباتی سہارا بھی فراہم کرتے ہیں، جس سے ان کے قریبی لوگ خود کو محفوظ اور محبت کے گھیرے میں پاتے ہیں۔ روٹ پیپل کی یہ خوبیاں ان کی زندگی میں ایک مضبوط اور استحکام بخش کردار ادا کرتی ہیں۔ ان کی موجودگی سے ہماری زندگی میں معنویت اور استحکام آتا ہے، جس سے ہماری شخصیت میں نکھار آتا ہے اور ہمارے ارد گرد کی دنیا مزید خوبصورت بنتی ہے۔

روٹ پیپل اکثر ان افراد میں سے ہوتے ہیں:

والدین اکثر روٹ پیپل کے طور پر سمجھے جاتے ہیں کیونکہ وہ زندگی کے ابتدائی دور سے ہی اپنی اولاد کی پرورش، تعلیم اور حفاظت کرتے ہیں۔ ان کا اثر لمبے عرصے تک قائم رہتا ہے، جو انہیں زندگی کی مضبوط بنیاد بناتا ہے۔

استاد اپنے شاگردوں کو علم کی روشنی فراہم کرتے ہیں اور ان کے فکری اور اخلاقی تربیت میں اہم کردار ادا کرتے ہیں۔ وہ اپنے شاگردوں کو صحیح راستہ دکھاتے ہیں اور زندگی کی مشکلات میں رہنمائی کرتے ہیں۔

ایک اچھا جانی دوست، جو آپ کی زندگی کے ہر مرحلے میں آپ کے ساتھ کھڑا ہو، وہ بھی روٹ پیپل میں شامل ہو سکتا ہے۔ ایسے دوست مشکل وقتوں میں جذباتی سہارا فراہم کرتے ہیں اور خوشی کے لمحات میں ساتھ دیتے ہیں۔ ہمہ یاراں جہنم، ہمہ یاراں بہشت!

مینٹورز، کوچ، اور پیشہ ورانہ رہنما اپنے تجربات اور مشوروں کے ذریعے آپ کی کیریئر گروتھ اور پیشہ ورانہ مہارتوں کی ترقی میں مدد کرتے ہیں۔ وہ آپ کو چیلنجز کا سامنا کرنے اور مواقع کا فائدہ اٹھانے کی ترغیب دیتے ہیں اور آپ کا عشروں کا سفر برسوں میں طے کروا دیتے ہیں۔

آپ کا محبوب یا محبت یا زندگی کا ساتھی بھی انہی روٹ لوگوں میں شامل ہو سکتا ہے اور آپ کی زندگی کو جڑیں پکڑنے میں بہت بڑی سپورٹ بن جاتا ہے۔

روٹ پیپل کے ساتھ تعلقات کو بہتر بنانے اور انہیں نرم و نازک انداز میں پروان چڑھانے کے لیے یہ اصول لازم ہیں:

روٹ پیپل کے ساتھ تعلقات میں احترام بنیادی عنصر ہے۔ ان کی باتوں کو غور سے سنیں اور ان کی رائے کو اہمیت دیں۔ ان کی زندگی میں جو کردار وہ ادا کر رہے ہیں، اس کا اعتراف کریں اور قدردانی کریں۔

روٹ پیپل کے ساتھ کنکشن میں تعطل نہ آنے دیں۔ باقاعدگی سے ان سے رابطہ کریں، خواہ میسج کے ذریعے ہو یا فون کال کے ذریعے۔ اپنی زندگی کے اہم واقعات اور جذبات کو ان کے ساتھ بانٹیں۔

جیسے وہ آپ کی مدد کرتے ہیں، آپ بھی ان کے لیے مددگار ثابت ہوں۔ ان کی ضروریات کا خیال رکھیں اور جب بھی موقع ملے ان کی مدد کریں۔

ان کے ساتھ جذباتی سطح پر بھی رابطہ رکھیں۔ ان کی خوشیوں اور غموں میں شریک ہوں۔ ان کی جذباتی ضروریات کو سمجھنے کی کوشش کریں اور ان کے لیے ترجیحاً موجود رہیں۔

کسی بھی تعلق میں اختلافات ممکن ہیں۔ اگر آپ کے اور آپ کے روٹ پیپل کے درمیان کوئی اختلاف پیدا ہو جائے، تو اسے خندہ پیشانی سے حل کرنے کی کوشش کریں۔ صبر و تحمل سے کام لیں اور اختلافات کو شانتی سے سلجھائیں۔

اپنے روٹ پیپل کی موجودگی کا شکریہ ادا کریں۔ ان کے لیے ایسی چیزیں کریں کہ انہیں محبت کی رسید ملتی رہے اور انہیں فار گرانٹڈ مت لیں۔

یاد رکھیں اپنی جڑوں کو پانی دینا ضروری ہے ورنہ ہرے بھرے درخت بھی سوکھ جاتے ہیں۔

روٹ پیپل جہاں ہماری زندگی کو جڑیں پکڑنے میں سب سے اہم ترین کردار ادا کرتے ہیں، وہاں بعض اوقات جڑیں کھوکھلی کرنے میں بھی ان کا کردار ہوتا ہے، ان منفی اٹرات سے بچنے کے لیے کل الگ الگ سے بات کریں گے۔