اسٹوری آف لائف
یہ پیٹر کی کہانی ہے، مشرقی یورپ کے پیٹر کی کہانی۔ پیٹر کی عمر آٹھ سال تھی، وہ مشرقی یورپ کے کسی چھوٹے سے گاؤں میں رہتا تھا، والدین زمیندار اور خوش حال تھے، پیٹر ان کی اکلوتی اولاد تھا، وہ خوبصورت بھی تھا، ذہین اور مہذب بھی۔ خاندان سے لے کر گاؤں کے بچوں، لڑکوں اور بوڑھوں تک سب اس سے خوش تھے۔
وہ اسکول میں ہردل عزیز تھا، ساتھی طالب علم بھی اسے پسند کرتے تھے اور وہ اساتذہ کا بھی پسندیدہ اسٹوڈنٹ تھا، وہ ہمیشہ ہوم ورک کر کے اسکول آتا تھا، وہ کھیل، کلاس ورک اور مطالعہ تینوں میں لاجواب تھا، گویا پیٹر گاؤں کا بے مثال بچہ تھا، بس اس میں ایک خرابی تھی، وہ خرابی کیا تھی؟
میں اس طرف آنے سے پہلے آپ کو یہ بتاتا چلوں، یہ صرف پیٹر کی کہانی نہیں، یہ دراصل ہم سب کی کہانی ہے، ہم سب کسی نہ کسی سطح پر پیٹر ہیں اور ہم پیٹر کی اس کہانی سے ہوتے ہوئے بہت جلد اپنی ذات میں چھپے پیٹر تک پہنچ جائیں گے چنانچہ یہ کہانی پیٹر کے ساتھ ساتھ ہماری کہانی بھی ہے، اللہ دتہ، محمد معراج الدین، ظفر اقبال اور محمد آصف کی کہانی۔ یہ کہانی ہماری کہانی کیسے ہے؟ ہمیں یہ جاننے کے لیے پہلے پیٹر کی کہانی سننا ہو گی۔
پیٹر میں بس ایک خرابی تھی، وہ "ڈے ڈریمنگ" کا شکار تھا، وہ بیٹھے بیٹھے کھلی آنکھوں کے ساتھ خواب دیکھتا تھا، وہ لمحہ موجود میں زندہ نہیں رہتا تھا، وہ وقت کو کبھی آگے لے جاتا تھا اور کبھی پیچھے۔ وہ اکثر اوقات کلاس میں بیٹھ کر خیالوں ہی خیالوں میں بیس سال کا خوبصورت جوان بن جاتا تھا، وہ خود کو گھوڑے پر بیٹھا ہوا دیکھتا، گھوڑے کو ایڑھ لگاتا اور اس کا گھوڑا ہوا سے باتیں کرنے لگتا، پیٹر خیالوں کی دنیا میں سفر کرتا ہوا کبھی جنگیں لڑتا، کبھی شہزادی کے محل میں پہنچ جاتا، کبھی کسی ملکہ کو اغواء کر کے گھوڑے پر بٹھاتا، گھوڑے کو وادیوں، پہاڑوں، جنگلوں اور میدانوں میں دوڑاتا اور دشمنوں کے گھوڑوں کو اپنے پیچھے بھاگتا ہوا محسوس کرتا، وہ کبھی خیالوں کی دنیا میں پولو کے میچ کھیلتا، کبھی تاجر بن کر منڈی میں اترتا، کبھی جہاز ران بن کر سمندر کی لہروں سے لڑتا۔
کبھی اس کا بحری جہاز کسی بے آب و گیاہ اجنبی جزیرے پر رک جاتا اور وہ باقی زندگی رابن سن کروسو بن کر گزار دیتا، وہ کبھی ویگا بانڈ بن جاتا اور کبھی رابن ہڈ بن کر امیروں کو لوٹنے اور غریبوں میں تقسیم کرنے لگتا، وہ کبھی بوڑھا کنگ لیئر بن جاتا اور محسوس کرتا، وہ بیمار بوڑھا بادشاہ ہے، وہ موت کے بستر پر لیٹ کر آخری سانسیں لے رہا ہے اور اس کی شہزادیاں اور شہزادے وصیت سننے کے لیے اس کے گرد کھڑے ہیں اور وہ کبھی کبھی خود کو پوپ بھی محسوس کرنے لگتا، وہ سمجھتا وہ ویٹی کن سٹی میں پوپ کی بالکونی میں کھڑا ہے اور پوری دنیا بالکونی کے نیچے کھڑی ہو کر اس کی زیارت کر رہی ہے۔
وہ وقت کو آگے اور پیچھے لے جانے والے اس کھیل کو بہت انجوائے کرتا تھا، وہ گھنٹوں بیٹھ کر یہ کھیل کھیلتا تھا، دنیا میں اس کھیل میں اس سے بڑا کوئی کھلاڑی نہیں تھا، وہ کلاس روم میں بیٹھ کر خیالوں ہی خیالوں میں کھیل کے میدان میں بھی چلا جاتا تھا، وہ کھیل کے دوران خود کو دنیا کا کامیاب ترین کھلاڑی بھی محسوس کرتا تھا اور وہ واش روم میں کموڈ پر بیٹھ کر اپنے فارم ہاؤس میں کاشتکاری بھی شروع کر دیتا تھا۔
پیٹر ایک شاندار بچہ تھا، بس اس میں صرف یہ خرابی تھی، وہ ذہنی طور پر وہاں موجود نہیں ہوتا تھا جہاں وہ جسمانی طور پر ہوتا تھا، اس کا جسم اور اس کا ذہن ہر وقت دو الگ الگ دنیاؤں میں رہتے تھے، وہ وہاں نہیں رہتا تھا جہاں اسے رہنا چاہیے تھا، پیٹر کی خواہش تھی وہ کسی نہ کسی طریقے سے وقت کو کنٹرول کرنا سیکھ لے، وہ جب چاہے وقت کو آگے لے جائے اور جب چاہے وقت کو ری ورس کر لے، وہ ہمہ وقت یہ خواہش لے کر گھومتا پھرتا رہتا تھا۔
آپ اللہ کی کرنی دیکھئے، پیٹر ایک دن جنگل سے گزر رہا تھا، پیٹر کو ٹھوکر لگی، وہ گرا اور بے ہوش ہو گیا، آنکھ کھلی تو اس نے ایک بڑھیا کو اپنے اوپر جھکے ہوئے پایا، یہ بڑھیا وقت تھی، وقت نے پیٹر سے اس کی زندگی کی سب سے بڑی خواہش پوچھی، پیٹر نے کہا "میں چاہتا ہوں، میں جب چاہوں، میں وقت کو آگے پیچھے لے جا سکوں" بڑھیا نے قہقہہ لگایا اور جواب دیا "بے وقوف بچے! وقت دریا ہے۔
یہ آگے کی طرف بہتا ہے، یہ پیچھے نہیں جاتا، میں تمہیں صرف وقت میں، صرف آگے بہنے کا طریقہ بتا سکتی ہوں" پیٹر مان گیا، بڑھیا نے اسے ایک گیند دی، گیند سے ایک دھاگہ باہر لٹک رہا تھا، بڑھیا نے اسے بتایا، یہ دھاگہ تمہاری زندگی جتنا طویل ہے، تم اس دھاگے کو جتنا باہر کھینچ لو گے، تم وقت میں اتنا ہی آگے چلے جاؤ گے، پیٹر خوش ہو گیا، بڑھیا چلی گئی، پیٹر نے تھوڑا سا دھاگہ کھینچا، ٹرررر، ٹرررز کی آواز آئی اور پیٹر دس سال آگے چلا گیا، وہ اب اٹھارہ سال کا خوبصورت جوان تھا۔
وہ جوانی کی ایڑھیوں پر چلتا تھا اور شہر کی حسین خواتین بالکونی میں کھڑی ہو کر اسے دیکھتی تھیں، پیٹر جوانی کو انجوائے کرنے لگا، وہ دن کے وقت گلیوں میں گھوڑے دوڑاتا، شامیں شراب خانوں اور رقص گاہوں میں گزارتا اور راتیں گاؤں کے اشرافیہ کے ہاں۔ پیٹر نے دیکھا، اس کے والدین بوڑھے ہو رہے ہیں، گاؤں کے سمجھ دار اور سیانے لوگ انتقال کر چکے ہیں اور گاؤں کا سائز بڑا ہو چکا ہے، پیٹر چند ماہ اس ٹائم فریم میں رہا، اکتاہٹ ہوئی تو اس نے صندوق سے گیند نکالا اور دھاگہ کھینچ دیا۔
وہ مزید دس سال آگے چلا گیا، وہ اب 28 سال کا جوان تھا، کھلنڈرے پن کی عمر گزر چکی تھی، وہ اب زندگی میں سیٹل ہونا چاہتا تھا، والدین بوڑھے بھی ہو چکے تھے اور بیمار بھی۔ زمینیں بک رہی تھیں، گھوڑے نیلام ہو رہے تھے اور جمع پونجی خرچ ہو رہی تھی، ماں کی کمر کا درد شدید ہوتا جا رہا تھا، وہ اب چلنے پھرنے سے بھی معذور تھی، والد کو دل کے امراض نے گھیر لیا تھا، ملازم ملازمت چھوڑ کر جا رہے تھے۔
پیٹر نے ملازمت کی کوشش کی لیکن وہ تعلیم کی کمی کی وجہ سے ناکام رہا، کاروباری کوشش کی لیکن ناتجربہ کاری، سستی اور لاابالی پن سے مار کھا گیا اور سیاست میں قدم رکھا مگر اس میں بھی فیل ہو گیا، غیر سنجیدہ ماضی کی وجہ سے دوست احباب بھی ساتھ چھوڑ رہے تھے، وہ اب گاؤں میں مارا مارا پھرتا تھا اور اپنی بے مقصد زندگی کو کوستا تھا، پیٹر چند دن میں زندگی کے اس فیز سے بھی اکتا گیا، اس نے گیند نکالی، دھاگہ کھینچا اور 38 سال کا ہو گیا، اس کی زندگی اب سیٹل ہو چکی تھی، سرکے بال کم ہو گئے تھے۔
کنپٹیاں سفید ہو رہی تھیں، گردن کے پچھلے مہروں میں اب ہلکی ہلکی درد رہتی تھی، محلے کی لڑکی ریٹا سے شادی بھی ہو چکی تھی اور اس کے دو چھوٹے چھوٹے بچے بھی تھے، ماں دو برس قبل انتقال کر گئی، باپ معذور ہوچکا تھا اور وہ اب سارا سارا دن وہیل چیئر پر بیٹھا رہتا تھا، بڑی حویلی اور فارم ہاؤس بک چکے تھے، وہ اب چھوٹے گھر میں رہتے تھے، بیوی اچار چٹنیاں بناتی تھی اور وہ بازار میں بیچ دیتا تھا، شام کے وقت گاؤں کے پب میں بیٹھ جاتا تھا اور بس یہ تھی زندگی۔
پیٹر نے گھبرا کر زور سے دھاگہ کھینچ دیا، وہ اس بار بیس سال آگے چلا گیا، وہ اب 58 برس کا تھا، بچے جوان ہو کر شہر جا چکے تھے، گھر مزید چھوٹا ہو گیا تھا، بیوی ریٹا کے گردے فیل ہو چکے تھے، وہ پیٹ پر بیگ لگا کرزندگی گزار رہی تھی، محلے کے تمام پرانے لوگ مر چکے تھے، گاؤں قصبہ بن گیا تھا اور اس میں ہر وقت شور ہوتا رہتا تھا، وہ باتھ روم میں گرنے کی وجہ سے اپنے کولہے کی ہڈی بھی تڑوا چکا تھا، ہڈی جڑ گئی لیکن اس کی چال میں جھول آ گیا۔
وہ اب چلتے ہوئے ایک سائیڈ پر ہلکا سا جھکتا تھا، بڑا بیٹا شہر سے پیسے بھجوا دیتا تو دونوں میاں بیوی تین وقت کھانا کھا لیتے تھے، پیسے نہیں آتے تھے تو وہ آلو ابال کر کھا لیتے تھے، گھر میں سرے شام اندھیرا ہو جاتا تھااور اس کے بعد وہاں دونوں میاں بیوی کی کھانسی کی آوازیں ہوتی تھیں، وہ دونوں کھانس کھانس کر رات گزار دیتے تھے، پیٹر لائف کے اس فیز سے بھی گھبرا گیا، اس نے گیند نکالی اور دھاگہ کھینچ دیا، وہ اب 68 سال کا ہو چکا تھا، بیوی فوت ہو چکی تھی، مکان بک گیا تھا، وہ اولڈ پیپل ہوم میں رہتا تھا، تمام دوست، احباب، رشتے دار مر چکے تھے۔
ریڈیو کی جگہ ٹی وی نے لے لی تھی اور ٹیلی ویژن انٹرنیٹ میں تبدیل ہو رہا تھا، پیٹر کے پھیپھڑوں میں اب پانی بھی بھر جاتا تھا اور حلق میں بلغم بھی آتی تھی، وہ چلنے پھرنے سے بھی تقریباً معذور ہو چکا تھا، وہ چند قدم اٹھاتا تھا اور تھک کر بیٹھ جاتا تھا، بھوک نہیں لگتی تھی اور اگر لگتی تھی تو کھانا نہیں ملتا تھا، کھانا مل جاتا تو دانت نہ ہونے کی وجہ سے وہ کھا نہیں پاتا تھا اور اگر وہ کھانا کھا لیتا تو کھانا ہضم نہیں ہوتا تھا اور اگر کھانا ہضم ہو جاتا تو قبض ہو جاتی تھی اور قبض بھوک سے زیادہ اذیت ناک ہوتی تھی۔
زندگی خوفناک بلکہ عبرتناک صورتحال اختیار کر چکی تھی، پیٹر سارا سارا دن ریلوے اسٹیشن پر بیٹھا رہتا تھا، وہ کتابیں پڑھنا چاہتا تھا لیکن نظر کی کمزوری آڑے آ جاتی تھی، وہ میوزک سننا چاہتا تھا لیکن کان کام نہیں کرتے تھے، وہ ماضی کو یاد کرنا چاہتا تھا لیکن یادداشت اس کا ساتھ نہیں دیتی تھی، باتیں، واقعات اور چیزیں آپس میں گڈ مڈ ہو جاتی تھی، پیٹر نے ایک دن ریلوے اسٹیشن پر بیٹھے بیٹھے اپنے آپ سے پوچھا " پیٹر! تمہاری زندگی کا شاندار ترین وقت کون سا تھا" اس کے دماغ میں فوراً آٹھ سال کے پیٹر کی تصویر ابھری، اسے محسوس ہوا۔
اس کی زندگی کا شاندار ترین وقت وہ تھا، جب وہ کھیتوں، جنگلوں اور وادیوں میں دوڑتا پھرتا تھا اور اندیشوں اور آلام کے سایوں نے ابھی جنم نہیں لیا تھا، پیٹر کی آنکھوں میں آنسو آ گئے، اس نے اپنے رعشہ زدہ ہاتھوں سے آخری بار دھاگہ کھینچا، ٹک کی آواز آئی اور دھاگہ ٹوٹ گیا، وہ اب اپنی قبر کے سرہانے کھڑا تھا، قبر پرانی بھی تھی، بوسیدہ بھی اور ویران بھی۔ قبر اپنے حالات کے منہ سے بول رہی تھی، مجھے مدت سے کسی نے نہیں دیکھا، میرے سرہانے کوئی نہیں آیا، کسی نے مجھ پر ایک پھول تک قربان نہیں کیا، پیٹر نے ہچکی لی اور اس کی آنکھ کھل گئی، وہ اسی طرح جنگل میں بیٹھا تھا، ہاتھ میں گیند تھی اور بڑھیا اس کے سامنے کھڑی مسکرا رہی تھی۔
پیٹر نے گیند بڑھیا کو واپس کی اور اس سے پوچھا "وقت کیا ہے" بڑھیا نے قہقہہ لگایا اور بولی "وقت آج ہے، وقت لمحہ موجود ہے، آج سے پہلے افسوس تھا اور آج کے بعد حسرت ہو گی" پیٹر نے پوچھا "اور زندگی کیا ہے" بڑھیا نے جواب دیا "زندگی آج کو انجوائے کرنے کا نام ہے، آج کا دن، صرف آج کا دن، لمحہ موجود، جو لوگ آج میں بیٹھ کر گزرے کل کو ٹھیک کرنے کی کوشش کرتے ہیں یا جو آج میں بیٹھ کر مستقبل کے خواب دیکھتے ہیں، ان سے بڑا بے وقوف کوئی نہیں ہوتا، انسان گزرے کل کو ٹھیک کر سکتا ہے اور نہ ہی آنے والے کل کو، یہ صرف آج کو ٹھیک کر سکتا ہے۔
یہ صرف آج کو درست رکھ سکتا ہے اور یہ صرف آج کو انجوائے کر سکتا ہے، تم آج آٹھ سال کے لڑکے ہو، تم اگلے سال نو سال کے ہو جاؤ گے، تم اس کے بعد کچھ بھی کر لو تم آٹھ سال میں واپس نہیں آ سکو گے چنانچہ اٹھو اور آٹھ سال کو انجوائے کرو، خود کو خوابوں میں ضایع نہ کرو کیونکہ رابن سن کروسو ہو، رابن ہڈ ہو یا پھر کنگ لیئر ہو، ان سب کا اختتام بہرحال ویران قبروں پر ہوتا ہے، دنیا میں ماضی اور مستقبل دونوں مر جاتے ہیں، صرف آج زندہ رہتا ہے چنانچہ زندہ میں زندہ رہو، ہمیشہ زندہ رہو گے" بڑھیا نے قہقہہ لگایا اور گیند سمیت غائب ہو گئی۔
پیٹر اٹھا اور وادی میں دوڑنے لگا، وہ اب آٹھویں سال کو انجوائے کر رہا تھا۔
