Quran e Pak Ko Samajh Kar Parhna
قرآنِ پاک کو سمجھ کر پڑھنا
قارئین آج اس اہم موضع پر قلم اٹھا رہا ہوں، کہ قرآن پاک جو اللہ کا کلام ہے اس کو آخری پیغمبر پر آخری کتاب کی صورت میں اتارا گیا۔ جو قیامت تک کے لوگوں کے لئیے راہ ہدائیت، زندگی گزارنے کی گائیڈ لائنز اور مکمل ظابطء حیات اور ایک فطری زندگی گزارنے کے طریقے پر مشتمل کلام اللہ ہے۔ مگر بہت افسوس ہے کہ ہمارے دادا، پر دادا، ماں، باپ، 60، 70، 80 سال کی زندگیاں گزار کر اس دنیا سے جا چکے ہیں مگر کبھی قرآن کو سمجھ کر نہیں پڑھا، کوئی آدمی جو قرآن پاک کو اپنی زبان میں سمجھ کر نا پڑھے وہ اس پر عمل کیسے کر سکتا ہے؟
جو ہمارے بزرگ اس دنیا سے جا چکے وہ تو واپس نہیں آ سکتے مگر ہم جو زندہ ہیں ہم، ہماری اولاد، ہمارے بزرگوں کی طرع بغیر قرآن پاک کو سمجھ کر پڑھے اس دنیا سے چلے جائیں گے؟ دن میں 24گھنٹے ہوتے ہیں، آئیے اپنا اور اپنی اولاد کا محاسبہ کرتے ہیں کہ 24 میں سے کتنے گھنٹے ہم اورہماری اولاد انٹرنیٹ (موبائل، لیپ ٹاپ) پر گزارتے ہیں؟ کیا ہم 24 گھنٹے کے دن رات سے آدھا گھنٹہ جی ہاں دن رات کے 1440 منٹوں سے صرف 30 منٹ قرآن پاک کو ترجمے اور تفسیر کے ساتھ پڑھنے اور سمجھنے پر صرف نہیں کر سکتے؟
ہم مرنے کے بعد اپنے رب کو کیا جواب دیں گے؟ کہ اللہ تعالیٰ کی طرف سے بیجھی گئی کتاب جوہماری اپنی زبان میں جی ہاں ہماری اپنی زبان میں ہمارے گھر موجود تھی اور ہم نے اپنی50، 60 سالہ زندگی میں اس کو کبھی بھی سمجھ کر نہیں پڑھا، اور جب سمجھ کر نہیں پڑھا تو عمل کیا کرنا، کیسےکرنا؟ ایک بزرگ عالم دین نے قرآن پاک کو سمجھ کر پڑھنے کے بارے میں ایک بہترین مثال سے سمجھا یا کہ اگر آپ کو گھرمیں کسی اجنبی زبان فرنچ، جرمن زبان میں کوئی لیٹر موصول ہو تو آپ فوراً کسی ترجمان کے پاس اپنی زبان میں ترجمے کی لئیے جائیں گے اور ترجمے کے زریعے اس عبارت کو سمجھے گے اور پھر اس پر عمل کریں گے۔
مگر افسوس کہ قرآن مجید مع ترجمہ آج ہر گھر میں موجود ہے مگر شاید 5 فیصد لوگ بھی قرآن پاک کو سمجھ کر نہیں پڑھتے، کتنے افسوس کا مقام ہے کہ راہ ہدائیت کی کتاب کو ہم نے صرف ثواب کی کتاب تک محدود کر دیا۔ اس میں کوئی شک نہیں کہ قرآن مجید پڑھنا بہت ثواب کا باعث ہے، مگر کیا بغیر سمجھے قرآن مجید پڑھنے سے ہم لوگ قرآن مجید کی تعلیمات پر عمل کر سکتے ہیں؟
قارئین محترم آج سے عہد کریں ہم خود بھی اور اپنی اولاد اپنے ماں باپ، بہن بھائی، عزیز و اقارب کو اردو یا اپنی مادری زبان میں قرآن مجید ترجمے کے ساتھ پڑھنے کی تلقین کریں گے۔ اور ترجمے والے قرآن مجید فیملیز، فرینڈز اور عزیز و اقارب کو گفٹ کرنے کی روایت ڈالیں گے، ہماری ان کوششوں سےچند لوگوں نے بھی قرآن پاک سمجھ کر پڑھ لیا تو پڑھنے والے کے ساتھ ساتھ ہم کوشش کرنے والوں کے لیےبھی بہترہو گا۔
قارئین محترم خاص کر بچوں کو قرآن پاک سمجھ کر پڑھانے کی طرف راغب کرنے کے لیئے پہلے ان کو قصص القرآن سے شروعات کروائیں۔ مثلاً سورۃ کہف سے۔ یقین کریں آپ اپنے بچوں کو آج ایک رکوع کا ترجمہ پڑھ کر سنائیں گے تو کل اگلے رکوع کے لیئے وہ خود اصرار کریں گے، اپنے بچوں کو آج کی ماڈرن اور نان مسلم کی سٹوریز (کہانیاں) سنانے کے بجائے قرآن مجید میں سابقہ اقوام کے واقعات پڑھ کر سنائیں۔
میں نے اپنے بچوں کو جب قرآن مجید کا ترجمہ پڑھ کر سناناشر وع کیا توابتداء سورۃ کہف سے کی بچوں میں قرآن مجید کا ترجمہ سننے کا بہت شوق پیدا ہوا۔ اللہ پاک نے ہماری عبرت کے لئیے قرآن مجید میں سابقہ اقوام کے واقعات کوبہت خوبصورتی سے بیان کیا ہے۔ یقین جانیں ہماری یہ کوشش ہمارے بچوں، بزرگوں بہن بھائیوں، عزیز رشتے داروں میں قرآن مجید کو سمجھ کر پڑھنے کی طرف راغب کرے گی۔ میں نے خود قرآن مجید نا صرف ترجمہ بلکہ تفسیر کے ساتھ مکمل کیا ہے، یقین کریں قرآن مجید سمجھ کر پڑھنے سے پہلے اور بعد کی زندگی میں بہت فرق لگتا ہے۔
اس سلسلے میں پی ٹی آئی حکومت نے بہت کام کیا۔ اگر میری معلومات درست ہیں تو پرائمری تک عربی زبان میں اور مڈل سکول، ہائی سکول، کالج اور یونیورسٹی میں ترجمے کے ساتھ قرآن مجید پڑھنا لازمی قرار دیا گیا۔ جس طرع پاکستان میں قانون تو بہت ہیں مگر عمل نہیں ہوتا۔ اللہ کرے اسی طرح اس اہم ترین معاملے پر بھی ایسا نا ہو، یونیونیورسٹی اور کالج کی ڈگری کو تکمیل ترجمہ و تفسیرقرآن مجید سے مشروط کیا جائے۔
قارئین اسی طرع نماز کو سمجھ کر پڑھنے کی طرف توجہ دینی چاہیے، آپ خود اپنے بچوں، ماں، باپ، بہن، بھائیوں کو نماز کا ترجمہ سکھائیں، آپ جب نماز میں عربی کے الفاظ ادا کریں گے اور ساتھ آپ کےذہن میں اس کا اردو ترجمہ آئے گا۔ جب آپ کو پتہ چلے گا کہ آپ اپنے رب سے کیا کہہ رہے ہیں تو آپ کو نماز میں بہت سکون محسوس ہو گا۔ اللہ پاک ہم سب کو قرآن پاک پڑھنے، سمجھنے اور عمل کی توفیق عطا فرمائے۔
