Dr Zaheer Abbas Meri Nazar Mein

ڈاکٹر ظہیر عباس میری نظر میں

راقم نے اردو ادب میں ایم۔ اے بطور پرائیویٹ امیدوار کیا۔ ایم۔ اے کی ڈگری لے لینے کے بعد پتا چلا کہ میرا تو ابھی تک اردو کا تلفظ ہی درست نہ ہے، جب ایک چیز کو درست پڑھا ہی نہ جا سکے تو وہ چیز پلے کیسے پڑے گی۔ نوکری کے ساتھ ساتھ اردو کی دوسری منزل تک جانا قدرے دشوار تھا۔ دو تین سال مسلسل کوشش کے بعد اردو کسی حد تک پڑھنی آ گئی۔ اسی دوران لائیبریری کی مستقل رکنیت لے لی اور خارجی مطالعے کی راہ ہموار ہوگئی۔

کچھ جدید و قدیم ناول اور افسانے بھی پڑھ چھوڑے۔ تنقید اور تحقیق کی بھی کوئی دو چار کتابیں نظروں سے گزار لیں، کیوں کہ جب آپ نے پرائیویٹ ایم۔ اے کیا ہو، آپ کو تنقید اور تحقیق کے سیاق و سباق سے بھی آگہی نہ ہو، تو جتنی مرضی تنقیدی و تحقیقی کتب پڑھ لیں، وہ نظروں سے گزارنے کے مترادف ہی متصور ہوں گی۔

روایتی قارئین کی طرح راقم کو شاعری پڑھنے کا بھی جنون کی حد تک شوق تھا۔ اسی شوق کی تسکین کے لیے ناصر کاظمی کو اپنی طرف سے اچھی طرح پڑھ چھوڑا۔ ایم۔ فل اردو میں نیا نیا داخلہ لیا تو محسوس ہونے لگ گیا تھا، کہ میرا رجحان شاعری کی طرف ہے اور میں ناصر کاظمی پہ مقالہ لکھوں گا۔ پہلا سیمسٹر گزر گیا، ناصر کاظمی کو اچھی طرح رٹ لیا گیا۔ پہلے سیمسٹر کے دوران بھی تنقید کچھ روٹھی ہوئی نظر آئی۔ تحقیق کا بھی حال اچھا نہیں تھا اور فکشن سے بھی دوستی نہیں ہو رہی تھی۔

دوسرے سیمسٹر کی پہلی ہی کلاس میں راقم نے ڈاکٹر ظہیر عباس کو تیسری آنکھ سے بھانپ لیا، جیسے ایک اچھا استاد کسی ہونہار طالب علم کو پہلی نظر میں پہچان لیتا ہے، ایک پڑھنے والا طالب علم بھی پڑھانے والے استاد کی جانچ کر لیتا ہے۔ خیر راقم کے سارے اندازے درست ثابت ہونے لگ گئے۔ تنقید اور عملی تنقید کی بھی سمجھ آنے لگ گئی۔ تحقیق کیسے کرنی ہے، کچھ کچھ پلے پڑنے لگ گیا۔ اب میں نے منٹو، عصمت، غلام عباس، بیدی، اسد محمد خان، یلدرم، پریم چند اور کافی مشہور ومعروف افسانہ نگاروں کو پڑھ رکھا تھا۔ سبھی افسانوں کے کردار رٹ چھوڑے تھے۔ سبھی افسانوں کے خلاصے اور اساسی تھیم ذہن نشین کر لیے۔

ایک بہت بڑا مسئلہ درپیش تھا کہ ان افسانوں پر بات کرنی نہیں آتی تھی۔ ایک مرکزی خیال کو طول دینا کار دشوار لگتا تھا۔ بات سے بات پیدا کرنا نہیں آتا تھا۔ ڈاکٹر صاحب کے ساتھ فکشن اور تنقید پر ہر روز سود مند بحث ہونے لگ گئی۔ انہوں نے عملی تنقید کا ایک ہی کیپسول دیا، کہ بیٹا کسی فن پارے کی عملی تنقید کرتے وقت کیا طریقہ کار اختیار کیا جاتا ہے، کن چیزوں کا خیال رکھا جاتا ہے۔ راقم نے دو تین سالوں میں جو کچھ پڑھ رکھا تھا، اس کی سمجھ آنے لگ گئی۔ افسانوں کے کردار بھول گئے، کہانیوں کے تھیم، پلاٹ، اسلوب، پس منظر، ان کی نفسیات، ماحول، رنگ، سوچ، اور تمام لازمی عوامل یاد رہنے لگ گئے۔

اسی اثناء میں راقم نے ڈاکٹر صاحب سے شاعری پر مقالہ لکھنے پر رائے لی، تو انہوں نے حکم دیا کہ اگر تم فکشن نہیں (پڑھو اور لکھو) گے تو اپنی طبعیت پر ظلم کرو گے۔ (کاکا) شاعری تمہارے بس کی بات نہیں۔ البتہ فکشن کے ساتھ تمہارا تعلق دیر پا نظر آتا ہے۔ ان کی یہ تھپکی کام آ گئی۔ اب فکشن پڑھنا تو آ گیا، لکھنا سیکھ رہا ہوں۔ وہ اکثر ایسی تھپکیاں دیتے رہتے ہیں اور ان کی ہر تھپکی کام آنے والی ہوتی ہے۔ چھوٹی سی غلطی بھی فوری پکڑ لیتے ہیں اور انگلی پکڑا کے چلنا سکھاتے ہیں۔ ان کی انگلی پکڑ لینے کے بعد پھسلنے کا ڈر بھی رفع ہو جاتا ہے۔

کسی فن پارے کو پڑھنے کے گر، سمجھنے کا فارمولا اور لکھنے کا فن انہی کی عطاء ہے۔ میرے لیے وہ ایسے ثابت ہوئے ہیں کہ جیسے دشت میں بہار آ جائے۔ وہ وسیع مطالعے کے مالک ہیں۔ عالمی ادب پر ان کی مسلسل نظر ہوتی ہے۔ خاص طور پر جدید ناول، افسانہ اور تنقید ان کے ریڈار میں ہوتے ہیں۔ وہ دور جدید کے صاحب اسلوب افسانہ نگار ہیں، فکشن اور تنقید کے سنجیدہ قاری ہیں۔ بطور شخصیت بھی وہ نستعلیق انسان ہیں۔ عجز و انکساری کا مرقع ہیں۔ ایک بہت اچھے دوست، شاخ زعفران اور محسن ہیں۔

علم دوست، ادب پرور، دور اندیش اور تعمیری سوچ کے مالک ہیں۔ علم سمیٹتے بھی ہیں اور بانٹتے بھی ہیں۔ آج کل یونیورسٹیوں میں نگران کے پاس اتنا وقت نہیں ہوتا کہ وہ اسکالرز کی راہنمائی کریں۔ میرے نگران نہ ہونے کے باوجود انہوں نے ایم۔ فل کے مقالے میں میری مکمل راہنمائی کی اور چوبیس گھنٹے خود کو میرے لیے دستیاب رکھا۔ جب بھی مشکل محسوس ہوئی بغیر وقت دیکھے انہیں کالز بھی کیں اور ملاقاتیں بھی ہوئیں۔ تحقیقی کام کے لیے موضوع کے انتخاب سے لے کر خاکہ تیار کرنے تک اور پھر دفاع کی آخری ساعت تک انہوں نے میرا ساتھ دیا۔

حال ہی میں ان کا افسانوی مجموعہ "مدفن کی تلاش" عکس پبلی کیشنز سے شائع ہو چکا ہے۔ بطور افسانہ نگار انہوں نے اردو افسانے میں کہانی پن کی واپسی کو یقینی بنایا، آسان علامتوں کا استعمال کیا، افسانے اور حقیقت کا ملاپ کروایا۔ کرداروں کو ان کی مرضی سے چلنے دیا ہے۔ ان کی کہانیوں کا مطالعہ بتاتا ہے کہ وہ مضبوط مشاہدے کے مالک ہیں۔ علاقائی رنگ بھی ان کے افسانوں میں موجود ہے اور آفاقیت بھی نظر آتی ہے۔