Takleef To Takleef He Hoti Hai

تکلیف تو تکلیف ہی ہوتی ہے

زندگی میں ہر انسان کسی نہ کسی آزمائش، پریشانی یا تکلیف سے گزرتا ہے۔ کوئی دکھ جسمانی ہوتا ہے، کوئی ذہنی، کوئی دل کا درد ہوتا ہے اور کوئی خاموشی میں چھپی ہوئی اذیت۔ مگر ایک بات ہمیشہ یاد رکھنی چاہیے کہ تکلیف، تکلیف ہی ہوتی ہے، چاہے وہ ہمیں ہو یا کسی اور کو۔

اکثر ایسا ہوتا ہے کہ جب ہمیں خود کوئی درد یا پریشانی ہوتی ہے تو ہم چاہتے ہیں کہ لوگ ہمیں سمجھیں، ہمارا حال پوچھیں، ہمیں سہارا دیں اور ہمارے درد کو محسوس کریں۔ لیکن جب یہی تکلیف کسی دوسرے کو ہوتی ہے تو ہم آسانی سے کہہ دیتے ہیں:

"اتنی بھی کیا تکلیف ہے؟"

"لوگ اس سے بڑی بڑی باتیں برداشت کر لیتے ہیں"۔

"تم بہت حساس ہو"۔

یہ جملے بظاہر چھوٹے ہوتے ہیں، مگر بعض اوقات کسی ٹوٹے ہوئے انسان کے لیے تیر بن جاتے ہیں، کیونکہ جس دل پر درد گزرتا ہے صرف وہی اس کی شدت جانتا ہے۔ ہر انسان کی برداشت الگ ہوتی ہے۔ جو بوجھ ایک شخص آسانی سے اٹھا لیتا ہے، وہی بوجھ کسی دوسرے کے لیے ناقابلِ برداشت ہو سکتا ہے۔

اسلام ہمیں دوسروں کے درد کو محسوس کرنا سکھاتا ہے، نہ کہ ان کی تکلیف کا مذاق اڑانا یا انہیں طعنے دینا۔ دلاسہ دینا سنت ہے، جبکہ کسی پریشان انسان کو مزید پریشان کرنا انسانیت کے خلاف ہے۔

ہمارے پیارے نبی حضرت محمد ﷺ کی زندگی صبر، آزمائش اور امید کی سب سے بڑی مثال ہے۔ ایک وقت ایسا بھی آیا جب کچھ عرصے تک وحی کا سلسلہ رک گیا۔ کفار نے طعنے دینے شروع کر دیے کہ شاید اللہ تعالیٰ نے اپنے نبی ﷺ کو چھوڑ دیا ہے۔ اس وقت نبی کریم ﷺ نے صبر فرمایا۔ پھر اللہ تعالیٰ نے سورۂ الضحیٰ نازل فرمائی اور اپنے محبوب ﷺ کو تسلی دی:

"مَا وَدَّعَكَ رَبُّكَ وَمَا قَلَىٰ"

ترجمہ: "آپ کے رب نے نہ آپ کو چھوڑا ہے اور نہ ناراض ہوا ہے"۔ (القرآن الكريم، سورۃ الضحیٰ)

یہ آیت صرف نبی کریم ﷺ کے لیے نہیں بلکہ ہر اُس انسان کے لیے امید کا پیغام ہے جو کسی تکلیف، تنہائی یا آزمائش سے گزر رہا ہے۔ کبھی کبھی انسان کو لگتا ہے کہ شاید اللہ تعالیٰ اسے بھول گئے ہیں، مگر حقیقت یہ ہے کہ اللہ اپنے بندے کو کبھی نہیں چھوڑتے۔ آزمائش وقتی ہوتی ہے، مگر اللہ کی رحمت ہمیشہ ساتھ ہوتی ہے۔

اگر کوئی شخص آپ کے سامنے اپنے درد کا اظہار کرے تو اسے کمزور نہ کہیں۔ اس کی بات سن لیں، اس کا حوصلہ بن جائیں اور اسے امید دلائیں کہ یہ وقت بھی گزر جائے گا۔ بعض اوقات انسان کو مشورے سے زیادہ صرف ایک نرم لہجے اور احساس کی ضرورت ہوتی ہے۔

یاد رکھیں، لوگوں کے زخم ہمیشہ نظر نہیں آتے۔ کچھ تکلیفیں چہرے پر نہیں بلکہ دل میں چھپی ہوتی ہیں۔ اس لیے دوسروں کی تکلیف کو بھی تکلیف سمجھیں۔ ہوسکتا ہے آپ کے دو نرم الفاظ کسی ٹوٹے ہوئے انسان کو دوبارہ جینے کا حوصلہ دے دیں۔

اللہ تعالیٰ ہمیں دوسروں کے درد کو سمجھنے والا دل عطا فرمائے، ہمارے لہجوں میں نرمی، ہمارے الفاظ میں محبت اور ہمارے رویّوں میں آسانی پیدا فرمائے۔ یا اللہ! جو لوگ کسی تکلیف، آزمائش یا پریشانی سے گزر رہے ہیں، ان کی مشکلات آسان فرما، ان کے دلوں کو سکون عطا فرما اور انہیں اپنی رحمت اور امید سے بھر دے۔