Pakistan Ki BRICS Mein Shamuliat Ki Khwahish Aur Ahmiyat
پاکستان کی برکس میں شمولیت کی خواہش اور اہمیت
پاکستان نے حالیہ برسوں میں اپنی معیشت کو بہتر بنانے کے لئے کئی اقدامات اٹھائے ہیں، اور ان میں سے ایک انتہائی اہم قدم برکس (BRICS) میں شمولیت کی درخواست ہے، جسے عالمی سطح پر نہایت اہمیت دی جا رہی ہے۔ پاکستان کی یہ درخواست ایک ایسے وقت میں سامنے آئی جب وہ شنگھائی تعاون تنظیم (SCO) کی میزبانی کر رہا ہے، جو خود ایک اہم بین الاقوامی فورم ہے اور جس کے ذریعے پاکستان اپنے عالمی تعلقات کو مزید مستحکم کرنے کی کوشش کر رہا ہے۔ برکس میں شمولیت کی درخواست، پاکستان کی اقتصادی بہتری کے لئے ایک اور قابلِ قدر کوشش ہے، جو ملک کو عالمی معیشت میں ایک نمایاں مقام دینے کی طرف ایک اہم قدم ہے۔
پاکستان کی معیشت، جو حالیہ برسوں میں مختلف چیلنجز کا سامنا کرتی رہی ہے، نے کئی اندرونی اصلاحات اور بیرونی شراکت داریوں کے ذریعے کچھ اہم پیش رفت کی ہے۔ چین کے ساتھ سی پیک منصوبہ اس کی واضح مثال ہے، جس نے بنیادی ڈھانچے اور توانائی کے شعبے میں نمایاں ترقی کی۔ برکس میں شمولیت کی خواہش اس مسلسل ترقی کا حصہ ہے، جو پاکستان کو عالمی سطح پر مزید اقتصادی مواقع فراہم کر سکتی ہے اور اسے بین الاقوامی معیشت میں ایک مضبوط کھلاڑی بنا سکتی ہے۔ برکس کی رکنیت حاصل کرنے سے پاکستان کو اقتصادی اور سیاسی طور پر بے شمار فوائد حاصل ہو سکتے ہیں۔
سب سے پہلے، پاکستان کو ترقی یافتہ اور ابھرتی ہوئی معیشتوں کے ساتھ مزید قریبی تعلقات استوار کرنے کا موقع ملے گا، جو عالمی تجارت اور سرمایہ کاری کے لئے ایک نیا دروازہ کھولے گا۔ اس کے علاوہ، پاکستان کی جغرافیائی حیثیت کو نظر انداز نہیں کیا جا سکتا، جسے برکس کے رکن ممالک خاص طور پر وسطی ایشیا اور مشرق وسطیٰ کے درمیان تجارت اور نقل و حمل کے مواقع کے لحاظ سے ایک اہم پل کے طور پر استعمال کرسکتے ہیں۔
روس کی جانب سے پاکستان کی برکس میں شمولیت کی کھل کر حمایت اس بات کی علامت ہے کہ عالمی سطح پر طاقت کے توازن میں تبدیلیاں آ رہی ہیں۔ روس، جو برکس کا ایک کلیدی رکن ہے، نے پاکستان کی درخواست کی تائید کرکے نہ صرف دونوں ممالک کے درمیان بڑھتے ہوئے تعلقات کو مزید مضبوط کیا ہے بلکہ بین الاقوامی اقتصادی اور سیاسی فورمز میں پاکستان کے لئے نئی راہیں بھی ہموار کی ہیں۔ روس کے نائب وزیراعظم الیکسی اوورچک نے واضح الفاظ میں پاکستان کی شمولیت کے حق میں بیان دیا، جس سے دونوں ممالک کے درمیان گہری اقتصادی اور سیاسی شراکت داری کا اشارہ ملتا ہے۔
روس کی طرف سے پاکستان کی برکس میں شمولیت کی تائید نہ صرف دونوں ممالک کے تعلقات کو مزید مضبوط کرنے کا باعث بنے گی، بلکہ یہ چین اور روس کے ساتھ پاکستان کی معاشی اور سیاسی شراکت داری کو بھی نئے افق تک لے جا سکتی ہے۔ روس اور چین، دونوں ہی عالمی سطح پر مغربی تسلط کو چیلنج کرنے والے اہم کھلاڑی ہیں، اور برکس کا مقصد بھی یہی ہے کہ مغربی معاشی بالادستی کے مقابلے میں ترقی پذیر اور ابھرتی ہوئی معیشتوں کو مضبوط کیا جائے۔
عالمی سیاسی منظرنامے میں برکس میں پاکستان کی شمولیت مغربی طاقتوں کے لئے ایک چیلنج بن سکتی ہے۔ برکس کا مقصد مغربی ممالک کے تسلط کو چیلنج کرنا ہے، اور پاکستان کی شمولیت اس بلاک کی طاقت میں مزید اضافہ کر سکتی ہے۔ خاص طور پر امریکہ اور یورپ کے ساتھ پاکستان کے تعلقات پر اس کے گہرے اثرات مرتب ہو سکتے ہیں، کیونکہ مغربی ممالک برکس کو اپنے عالمی اقتصادی اور سیاسی اثر و رسوخ کے لئے ایک متبادل طاقت کے طور پر دیکھتے ہیں۔ پاکستان کی برکس میں شمولیت عالمی اقتصادی اور سیاسی منظرنامے میں ایک اہم تبدیلی لا سکتی ہے۔ یہ نہ صرف پاکستان کی اقتصادی ترقی کو تقویت دے گی بلکہ اسے ایک اہم بین الاقوامی کھلاڑی کے طور پر بھی متعارف کرائے گی۔ روس اور چین جیسے بڑے اتحادیوں کی حمایت پاکستان کے لئے اس عالمی فورم میں اپنی جگہ مضبوط کرنے کا ایک سنہری موقع فراہم کرتی ہے۔
برکس میں شمولیت کی راہ میں کچھ چیلنجز میں بڑا چیلنج بھارت ہے جو برکس کا ایک بانی رکن ہے، پاکستان کی شمولیت کی شدید مخالفت کر رہا ہے، اور اس مخالفت کی جڑیں دونوں ممالک کے تاریخی تنازعات میں پائی جاتی ہیں۔ برکس میں بھارت اور پاکستان کے ایک ساتھ ہونے سے ممکنہ سفارتی تنازعات پیدا ہو سکتے ہیں، جو کہ اس عالمی فورم کی یکجہتی کو متاثر کر سکتے ہیں۔
پاکستان کو برکس میں شامل ہونے کے لئے اپنی معیشت کو مزید مستحکم کرنے کی ضرورت ہے۔ اس کے لئے ملکی سطح پر مزید اصلاحات اور پائیداری کو فروغ دینا ضروری ہوگا تاکہ پاکستان نہ صرف اس بلاک کے معیار پر پورا اترے بلکہ دیگر رکن ممالک کے ساتھ اقتصادی مسابقت میں بھی کامیابی حاصل کر سکے۔ داخلی اقتصادی استحکام اور مضبوط سفارتی حکمت عملی پاکستان کی برکس میں شمولیت کی کامیابی کی کلید ثابت ہو سکتی ہے۔
