سوال در سوال
چلیے ہم میاں نواز شریف اور آصف علی زرداری دونوں کو ہمیشہ کے لیے سیاست سے فارغ کر دیتے ہیں، ہم انھیں جیل میں ڈال دیتے ہیں یا پھر مستقل جلاوطن کر دیتے ہیں مگر یہاں پر دو سوال پیدا ہوتے ہیں، یہ کرے گا کون؟ کیا یہ کام عدلیہ کرے گی، اگر ہاں تو عدالت انھیں کس جرم میں جیل بھیجے گی اور انھیں کس قانون کے تحت جلا وطن کیا جائے گا؟ ہم فرض کر لیتے ہیں عدالتیں انھیں کرپشن، رشوت ستانی اور منی لانڈرنگ کے جرائم میں سزا دیتی ہیں، یہاں پر سوال پیدا ہوتا ہے، وہ مقدمات کہاں سے آئیں گے۔
ان کی تفتیش کون سے ادارے کریں گے اور ان اداروں کے لیے قانون سازی کون کرے گا؟ ہم اگر انھیں ان پرانے مقدموں میں سزا دیتے ہیں جو غلام اسحاق خان نے 1990ء اور 1993ء میں قائم کیے تھے یا سیف الرحمن نے 1996-97ء میں بنائے تھے یا پھر جنرل پرویز مشرف نے 1999ء میں قائم کیے تھے تو سوال پیدا ہوتا ہے انھیں ان مقدموں میں سزا کیسے ہو سکتی ہے جن کا فیصلہ پچھلے پچیس برسوں میں نہیں ہو سکا، یہ کیسز سیاسی حکومتوں اور جنرل پرویز مشرف کی عسکری حکومتوں میں بھی منطقی انجام تک نہیں پہنچ سکے، جنرل پرویز مشرف اور ان کا باوردی نیب 8 سال کی مسلسل کوشش کے باوجود میاں نواز شریف اور آصف علی زرداری کو سزا نہیں دے سکا تھا۔
یہ مقدمے کسی دور میں ثابت نہیں ہو سکے، یہ بالآخر سیاسی نکلے اور جنرل پرویز مشرف نے شریف فیملی کے ساتھ این آر او کر کے انھیں سعودی عرب بھجوا دیا اور پھر محترمہ بے نظیر بھٹو کے ساتھ دوسرا این آر او کیا اور انھیں 2007ء میں پاکستان آنے کی اجازت دے دی، نتیجہ کیا نکلا؟ ہماری ملکی تاریخ میں آج تک جنرل پرویز مشرف سے زیادہ بااختیار حکمران اور افتخار محمد چوہدری سے تگڑا چیف جسٹس نہیں آیا، جب یہ دونوں پورا زور لگانے کے باوجود ان دونوں کو سزا نہیں دے سکے، یہ ان دونوں خاندانوں کو جیل یا جلاوطن نہیں رکھ سکے تو موجودہ عدلیہ اور موجودہ سول حکومت یہ کام کیسے کرے گی؟ ہم فرض کر لیتے ہیں۔
یہ کام فوج سرانجام دیتی ہے، اب سوال یہ پیدا ہوتا ہے فوج یہ کام کس قانون، کس ضابطے کے تحت کرے گی کیونکہ آئین اور قانون فوج کو کوئی ایسا مینڈیٹ نہیں دیتا لہٰذا پھر فوج کے پاس مارشل لاء کے علاوہ کوئی آپشن نہیں بچتا، جنرل راحیل شریف آئیں، مارشل لاء لگائیں، آئین معطل کریں اور ان سب کو گرفتار کر لیں، یہ ہو سکتا ہے! لیکن سوال یہ ہے، اس کے بعد کیا ہوگا؟ ملک میں اس سے پہلے چار مار شل لاء لگ چکے ہیں، چاروں مارشل لائوں کی بنیادیں کرپشن اور بلاامتیاز احتساب تھا لیکن بلاامتیاز احتساب اور کرپشن فری معاشرہ تو رہا ایک طرف ملکی سالمیت اور استحکام کا ہی جنازہ نکل گیا، جنرل ایوب خان اور جنرل یحییٰ خان کے مارشل لائوں کا اختتام مشرقی پاکستان کی قربانی پر ہوا، جنرل ضیاء الحق کا مارشل لاء افغان جہاد پر ختم ہوا۔
ملک جنرل ضیاء کے دور میں ہیروئن، کلاشنکوف، ملائیت، علیحدگی پسندی اور سیاسی کرپشن کے عفریت کا شکار ہوگیا، آپ کو یقین نہ آئے تو آپ ذوالفقار علی بھٹو کے پاکستان کا جنرل ضیاء الحق کے پاکستان سے تقابل کر لیں، آپ کو دونوں میں زمین آسمان کا فرق ملے گا، پاکستان کی ساری موجودہ سیاسی قیادت بھی جنرل ضیاء الحق اور ان کے مارشل لاء کی باقیات ہے اور جنرل پرویز مشرف کا مارشل لاء خود کش دھماکوں، دہشت گردی کی پرائی جنگ، کراچی کی مافیا وار اور بلوچستان میں علیحدگی پسندی پر ختم ہوا، آپ ڈیٹا نکال کر دیکھ لیجیے۔
احتساب جنرل ایوب خان کے دور میں ہو سکا اور نہ ہی جنرل یحییٰ خان، جنرل ضیاء الحق اور جنرل پرویز مشرف کے سنہری ادوار میں ہوا، اگر یہ جسارت نہ ہو تو ہمیں ماننا ہوگا یہ چاروں مارشل لاء ملک میں نئے کرپٹ طبقات کی پیدائش کا باعث بنے، آپ صرف جنرل پرویز مشرف کے ساتھیوں کو دیکھ لیجیے، یہ لوگ نہ صرف کرپٹ تھے بلکہ یہ طوطا چشم، احسان فراموش اور بے وفا بھی تھے، آپ یاد کیجیے، وہ تمام لوگ جو جنرل پرویز مشرف کو سید پرویز مشرف کہتے تھے اور ان کی محفل میں ناچنا اعزاز کی بات سمجھتے تھے وہ ان کا اقتدار ختم ہونے کے بعد کہاں چلے گئے؟ وہ تمام لوگ اب ان سیاسی جماعتوں میں ہیں۔
جنھیں یہ ماضی میں گالیاں دیتے تھے، یہ لوگ آج جنرل پرویز مشرف کا نام تک لینا گناہ سمجھتے ہیں، آپ یہ حقیقت بھی ذہن میں رکھیے، جنرل پرویز مشرف کو چوہدری پرویز الٰہی یا گورنر عشرت العباد نے ملک سے باہر جانے کی اجازت نہیں دی، یہ نیک کام اس چوہدری نثار اور میاں نواز شریف نے کیا جنھیں یہ 9 سال دنیا بھر میں گھسیٹتے رہے لہٰذا پھر پانچواں مارشل لاء کون سا ایسا نیا پھل دے گا جس سے ہم پچھلے چار مارشل لائوں میں محروم رہے اور یہ کرپشن کے خاتمے اور بلاامتیاز احتساب کا کون سا ایسا سسٹم بنا دے گا جو پچھلے چار مضبوط ترین جنرل نہیں بنا سکے۔
میں دل سے یہ سمجھتا ہوں ملک میں آج تک "نیب" سے تگڑا کوئی ادارہ نہیں بنا، یہ ادارہ 8 برس تک براہ راست فوج کے ماتحت رہا، اس کے سربراہ حاضر سروس لیفٹیننٹ جنرل ہوتے تھے اور تفتیش کا کام بھی فوجی افسر کرتے تھے لیکن یہ لوگ بھی کرپٹ سیاستدانوں کا احتساب نہیں کر سکے، یہ بھی میاں نواز شریف اور بے نظیر بھٹو کی سیاسی نس بندی نہیں کر سکے، اگر وہ لوگ یہ نہیں کر سکے تو پھر ملک کا کوئی نیا ادارہ یہ کام نہیں کر سکے گا، آپ کو اس کے لیے ایک ایسا آزاد اور خودمختار سسٹم بنانا ہوگا جس کی نظر میں کوئی گائے مقدس نہ ہو، جو ملک کے تمام اداروں اور شخصیات کو ایک نظر سے دیکھے اور وہ نظر قانون کی نظر ہو لیکن آپ کو اس سسٹم سے پہلے ملک کا سارا نظام کمپیوٹرائزڈ کرنا ہوگا۔
ملک کی تمام زمینیں کمپیوٹرائزڈ ہوں، ملک کے سارے سودے بینکوں کے ذریعے ہوں اور سو روپے سے لے کر ارب روپے تک کی ادائیگی کریڈٹ کارڈ یا چیک کے ذریعے کی جائے اور جس شخص کے گھر، دفتر یا جیب سے 50 ہزار روپے کے نوٹ نکل آئیں، اسے گرفتار کر لیا جائے لیکن یہ سردست ممکن نہیں، کیوں؟ کیونکہ پاکستان 18 سے 20 کروڑ لوگوں کا ملک ہے مگر ریاست کے پاس صرف 13 کروڑ لوگوں کا ڈیٹا ہے، گویا آج بھی چھ سے سات کروڑ لوگ نادرا کے ڈیٹا میں مسنگ ہیں، یہ لوگ آج بھی نادرا کے ریکارڈ سے غائب ہیں، ملک کے 96 فیصد تاجروں کا 90 فیصد کاروبار کیش پر چل رہا ہے، 20 کروڑ لوگوں میں سے صرف ساڑھے آٹھ لاکھ لوگ ٹیکس دیتے ہیں اور ان میں بھی 60 فیصد لوگ ملازم پیشہ ہیں۔
آپ جب کھلی آنکھوں کے سامنے پڑی یہ کرپشن نہیں روک پا رہے تو آپ "آف شور کمپنیاں" کیسے تلاش کریں گے، آپ آصف علی زرداری اور میاں نواز شریف کی دولت کا "فرانزک آڈٹ" کیسے کریں گے اور اگر آپ نے یہ کر بھی لیا تو پھر ہم قوم کو جنرل اسلم بیگ، جنرل اسد درانی، ایڈمرل منصور الحق، جنرل پرویز مشرف کے آف شور اکائونٹس، این ایل سی کے جرنیلوں کے اکائونٹس اور جنرل اشفاق پرویز کیانی کے بھائیوں کی دن دگنی اور رات چوگنی ترقی کا کیا جواب دیں گے؟ ہمیں افغان وار اور دہشت گردی کے خلاف جنگ کے اکائونٹس بھی کھولنا پڑیں گے، ہمیں ان کا حساب بھی دینا ہوگا اور کیا ہم یہ حساب دے سکیں گے؟ اگر نہیں تو کیا پھر شریف اور بھٹوز کا احتساب بلاامتیاز سمجھا جائے گا، کیا قوم مطمئن ہو جائے گی؟
ہم یہ بھی فرض کر لیتے ہیں فوج ملک کو بچانے کے لیے ایک بار پھر کڑوا گھونٹ بھر لیتی ہے، یہ اقتدار میں آ جاتی ہے، اب سوال یہ ہے، اس کے بعد کیا ہوگا؟ آصف علی زرداری ملک سے باہر ہیں اور میاں نواز شریف ملک سے باہر چلے جاتے ہیں اور پیچھے عمران خان، چوہدری صاحبان، مولانا فضل الرحمن اور شیخ رشید رہ جاتے ہیں، کیا فوج دنیا بھر کی بدنامی، دنیا بھر کی مخالفت اس لیے مول لے گی کہ یہ اقتدار طشتری میں رکھے اور ان لوگوں کے حوالے کر دے، سوال یہ ہے اگر جنرل راحیل شریف صرف عمران خان کو وزیراعظم بنوانے کے لیے اتنا بڑا ایڈونچر کرتے ہیں۔
یہ صرف عمران خان کے لیے امریکا، یورپی یونین، روس اور چین کو ناراض کر دیتے ہیں، یہ پاکستان کی امداد بھی رکوا لیتے ہیں اور ملک میں جاری منصوبے بھی بند کرا لیتے ہیں، یہ سجا سجایا تخت عمران خان کے حوالے کرتے ہیں اور خود ریٹائر زندگی گزارتے ہیں تو فوج کو اس کا کیا فائدہ ہوگا، کیا یہ عقل مندی ہوگی؟ ہم فرض کر لیتے ہیں، یہ بھی ہو جاتا ہے، فوج اقتدار عمران خان کے حوالے کرنے کا فیصلہ کر لیتی ہے، اب سوال یہ ہے، یہ ہوگا کیسے؟ کیا فوج ایک بار پھر جنرل پرویز مشرف، جنرل ضیاء الحق اور جنرل ایوب خان کی طرح کنگز پارٹی بنوائے گی اور کیا یہ ملک کے تمام سیاسی لوٹوں کو جمع کر کے عمران خان کی جھولی میں ڈال دے گی؟ اگر ہاں تو پھر میاں نواز شریف، آصف علی زرداری اور عمران خان میں کیا فرق رہ جائے گا؟ اور وہ لوگ جو پیپلز پارٹی اور مسلم لیگ ن چھوڑ کر عمران خان کا ساتھ دیں گے کیا وہ اپنی وفاداری کی تبدیلی کی قیمت وصول نہیں کریں گے؟
کیا پھر عمران خان کو بھی ایم کیو ایم، بلوچستان کی سیاسی جماعتوں، فاٹا کے ممبران، چوہدری صاحبان اور مولانا فضل الرحمن کو ساتھ رکھنے کے لیے آصف علی زرداری نہیں بننا پڑے گا؟ اگر ہاں تو پھر تبدیلی کہاں جائے گی؟ اور دوسرا آپ اگر الیکشن کراتے ہیں تو آپ پنجاب سے مسلم لیگ ن اور سندھ سے پیپلز پارٹی، کے پی کے سے اے این پی اور جے یو آئی اور بلوچستان سے بلوچ جماعتوں کو انتخابی سیاست سے باہر کیسے رکھیں گے؟ آپ کو یقینا اس نیک کام کے لیے الیکشن میں دھاندلی کرانا پڑے گی لہٰذا سوال پیدا ہوتا ہے، دھاندلی سے بننے والی وہ حکومت کس حد تک نیک ہوگی، وہ کس حد تک بلاامتیاز احتساب کرے گی؟ وہ ملک سے کتنی کرپشن ختم کرا لے گی؟ اور ایک اور سوال، ملک میں اگر آزاد اور شفاف الیکشنوں کے بعد بھی پاکستان مسلم لیگ ن اور پیپلز پارٹی جیت جاتی ہیں۔
اگر کے پی کے میں مذہبی جماعتیں مینڈیٹ لے لیتی ہیں اور کراچی کے عوام ایم کیو ایم کے حق میں ووٹ دے دیتے ہیں تو پھر آپ کیا کریں گے؟ کیا ملک میں ایک بار پھر 1970ء کی تاریخ دوہرائی جائے گی، کیا ایک بار پھر "اُدھر تم اِدھر ہم" ہوگا اور ایک اور سوال، آپ اگر آصف علی زرداری اور میاں نواز شریف دونوں پر پابندی لگا دیتے ہیں تو آپ بلاول بھٹو اور مریم نواز کو سیاست سے کیسے باہر رکھیں گے۔
یہ اگر سیاست میں رہیں گے تو پھر نواز شریف اور آصف علی زرداری بھی ہوں گے چنانچہ پھر "انقلاب" کا کیا ہوگا، ہمیں ہر قسم کی تبدیلی سے پہلے یہ ذہن میں رکھنا ہوگا کہ جس ملک میں بھٹو 1979ء میں پھانسی لگنے کے بعد آج تک زندہ ہے، جس میں محترمہ بے نظیر بھٹو کی شہادت کے بعد ان کی تصویر حکمرانی کر رہی ہے اور جس میں میاں نواز شریف نے سات سال کی جلاوطنی کے بعد واپس آ کر دو ماہ میں پنجاب میں حکومت بنا لی اور وفاق میں 125نشستیں حاصل کر لیں آپ اس ملک میں ان دونوں خاندانوں کو سیاست سے کیسے باہر رکھیں گے؟
آپ کل تک ان سوالوں کا جواب تلاش کریں۔
