Ajzaa Ki Wasooli

اجزاء کی وصولی

لاشیں مٹی کے سپرد کرنا آگ لگا دینا یا کسی بلڈنگ کی چھت پر بغیر کسی مذہبی رچوئل کے رکھ دینا، یہ سب عمل ایک جیسے ہی ہیں۔ مردے کو کچھ فرق نہیں پڑتا کہ مرنے کہ بعد اسے دفنایا گیا یا کہیں بغیر کفن دفن اور اگنی کے حوالے کیے پھینک دیا گیا۔

مرنے کے بعد ہر لاش عملِ بوسیدگی کے حوالے ہوتی ہے۔ ایک وقت میں جو آرگنز آدمی کی بقا اور اُس کے جسم کو بچانے کے لیے متحرک ہوتے تھے اب وہ محض بہتّر گھنٹے کے اندر اُس میں سانس کی عدم موجودگی نہ پاکر وہ مادے جسم میں خارج کرنے لگتے ہیں جن سے باڈی ٹوٹ پھوٹ کا شکار ہوکر جلد از جلد ہڈیوں سے ماس اکھاڑ کر کاربن، مٹی، ہوا اور پانی کے سپرد کرنے لگتی ہے۔ یہی حقیقت ہے۔ جیتے جی جو مادے جتنی مقدار میں ہوا پانی اور مٹی سے کشید کیے وہ سب واپس لوٹانے ہوتے ہیں قدرت اس لین دین کا مکمل حساب رکھتی ہے۔ نہ لوٹانے کا تو سوال ہی نہیں۔

ہم قرض لیے مادوں پر جیتے ہیں جن پر موت کا ٹیکس لاگو ہے۔

خالی ہاتھ قبر میں کوئی نہیں جاتا۔ زمین کے لیے بےجان جسم وصولی کے لیے آیا مال ہوتا ہے جس کے ذرے ذرے سے قرض وصول کیا جاتا ہے۔ زمین پر ایک سانس لی یا سو سال تک سانسیں میسر آئی، آپ کا وجود مٹی ہوا پانی کا قرض دار ٹھہرا جس سے فرار اور انکار ممکن نہیں۔

زمین پر جابجا کھلتے پھولوں کے ان گنت رنگوں میں، شیریں اور خوش ذائقہ پھلوں کے رس میں، بیج سے بنے تن آور شجر میں، لامحدود حدوں تک پھیلے سبزہ زاروں کی حیات میں نجانے کتنے ہی مردہ جسموں کے ٹوٹے ذرے شامل ہوں یہ کوئی نہیں جانتا، مٹی جانتی ہے، مگر خاموش ہے۔

کوئی زمین پر رہتے ہوئے کتنا مصروف رہا، خاص رہا، نامور ہوا یا تنگی حیات میں پسا رہا، کسی کام میں آیا یا بند کمرے میں گمنام رہا، کسی کے وجود کی موجودگی سے عمر دراز تہذیبوں نے جنم لیا، تاریخ نے نئی کروٹ لی، کسی نے قانون بنائے، توڑے، انسانیت کو ایجاد و دریافت کی معراج پر لاکھڑا کیا مٹی کی روش میں کسی کے لیے کسی بھی بنا پر کوئی تمیز نہیں۔ ہٹلر و راسپوتین پیغمبر و بدھا کا جسم مٹی کے لیے کسی بھی طور مختلف نہیں، قابل تکریم نہیں قابلِ نفرت اور عقیدت نہیں۔ زمین تلے کوئی سزا و جزا نہیں، فقط وصولی ہے۔ اُن اجزاء کی وصولی جو زمین نے ہر صورت میں ہر وقت آدمی کو مہیا کیے رکھے۔

ہم ستاروں کی باقیات اور دھول ہوسکتے ہیں، ہم کروڑوں ناممکنات سے پیدا ہوئی ایک ممکن صورت ہوسکتے ہیں، مرکبات کی خاص ترکیب سے وجود میں آیا ایک عجوبہ ہو سکتے ہیں، انفرادی طور پر ہم کسی بھی حد تک حیران کن ہوسکتے ہیں مگر بطور مجموعی ہم کسی طور بھی اپنے جیسے کسی اور سے وجود اور اختتام کے کسی ایک پہلو پر بھی کچھ خاص نہیں ہیں، زرا حیران کن نہیں ہیں۔