Yas Island Abu Dhabi, Saqafat o Tafreeh Ka Haseen Ajooba

یاس آئی لینڈ ابو ظہبی، ثقافت و تفریح کا حسین عجوبہ

متحدہ عرب امارات کی سات ریاستوں میں، ابو ظہبی ایک منفرد مقام رکھتا ہے اور اس کا دل ہے یاس آئی لینڈ۔ تقریباً 2800 ایکڑ پر پھیلا ہوا، یہ جزیرہ، جہاں جدید تفریح، ثقافت اور قدرتی حسن کی مکمل ہم آہنگی نظر آتی ہے، ہر سال لاکھوں سیاحوں کی توجہ کا مرکز بنتا ہے۔

ہم نے اس حسین جزیرے کا سفر اپنی فیملی کے ہمراہ کیا، جس میں میرے بیٹے محمد ریان نور اور بیٹی فاطمہ نور اور زوجہ شامل تھیں۔ صبح کے وقت، ہم نے ابو ظہبی کیلئے روانگی کی اور تقریباً دو گھنٹے کی ڈرائیو کے دوران، روایتی کڑک چائے کے ساتھ ریفریشمنٹ کا لطف اٹھایا۔ بچوں کو ہلکی پھلکی غذائیں دی گئیں، تاکہ ان کی توانائی برقرار اور سفر کے دوران ان کا مزاج خوشگوار رہے۔

یاس آئی لینڈ پر قدم رکھتے ہی ہمیں ایک جدید اور شاندار دنیا میں قدم رکھنے کا احساس ہوا۔ سب سے پہلے ہمارا رخ ہوا، اس کے عالمی معیار کے فرسٹ کلاس لگژری ہوٹل کمپلیکس کی طرف، جہاں مہمان نوازی کی بہترین مثالیں ملتی ہیں۔ یہ ہوٹل نہ صرف آرام دہ رہائش فراہم کرتے ہیں بلکہ اپنے شاندار معماری اور ماحول کی بنا پر سیاحوں کے دل جیت لیتے ہیں۔

پھر ہم گئے، مشہور فراری ورلڈ تھیم پارک، جو دنیا کا سب سے بڑا انڈور تھیم پارک ہے۔ یہاں"فورمولا روسا" رولر کوسٹر 240 کلومیٹر فی گھنٹہ کی رفتار سے چلتی ہے، جو اسے دنیا کی تیز ترین رولر کوسٹر بناتی ہے۔ محمد ریان نور اور فاطمہ نور کی خوشیاں دیکھ کر میرا دل بھر آیا۔ اس پارک میں جدید تفریحی سہولیات نے ہر عمر کے افراد کو مسحور کر دیا۔

اس کے بعد ہم وائلڈ وادی واٹر پارک پہنچے، جو اپنی 15 سے زائد پانی کی سلائیڈز اور مصنوعی نہروں کے لیے مشہور ہے۔ یہاں کا پانی اتنا صاف اور سرد تھا، کہ قدرتی سکون کا احساس دلاتا ہے۔ بچوں کی ہنسی اور ان کی توانائی نے ہمیں بھی محظوظ کیا۔

دوپہر کو ہم یاس مال گئے، جو تقریباََ 370,000 مربع میٹر پر محیط ہے اور دنیا کے مشہور برانڈز کی دکانوں سے بھرا ہوا ہے۔ یہاں شاندار ریسٹورینٹس اور کیفے کلچر نے ہمیں خوش آمدید کہا۔ کیفے میں بیٹھ کر میں اور میری زوجہ نے چند لمحے سکون کے ساتھ گزارے اور ہم سب نے مل کر ریفریشمنٹ کیا۔

یاس آئی لینڈ کے پرسکون ساحل، جہاں سفید ریت اور نیلا پانی آمنے سامنے ہیں، دل کو ایک عجیب راحت دیتے ہیں۔ یہاں کی ہوا میں تازگی اور قدرت کی معجزاتی شان دکھائی دیتی ہے۔ ہم نے ساحل پر کچھ وقت گزارا اور بچوں کے کھیلنے کی خوشی میں شریک ہوئے۔

یاس مارینا میں کشتی رانی کا تجربہ ایک الگ ہی سکون لے کر آیا۔ پانی کی ہلکی لہریں اور سمندر کی وسعت نے مجھے زندگی کی عظمت کا احساس دلایا۔ یہاں واٹر اسپورٹس کے کئی مواقع بھی موجود ہیں، جو یہاں کے فنون کو نمایاں کرتے ہیں۔

عالمی معیار کے گالف کورسز نے بھی ہمارا دل جیتا۔ ہر سال یہاں بین الاقوامی ٹورنامنٹس کا انعقاد ہوتا ہے، جو اس علاقے کی اہمیت کو بڑھاتے ہیں۔ جدید فن تعمیر کے آئیکونک اسٹرکچرز نے جزیرے کو ایک خاص جمالیاتی روپ دیا ہے۔

یاس آئی لینڈ نہ صرف تفریح کے لیے ہے بلکہ ثقافتی اور آرٹس ایونٹس کی میزبانی بھی کرتا ہے، جو اسے ایک زندہ دل اور متحرک مقام بناتے ہیں۔ یہاں کار شوز اور موٹر اسپورٹس کے عالمی ایونٹس بھی منعقد ہوتے ہیں، جو شائقین کے لیے باعث دلچسپی ہیں۔

پورے جزیرے میں فیملی فرینڈلی ماحول اور سرگرمیاں موجود ہیں، جہاں ہر عمر کے لوگ اپنی پسند کے مطابق تفریح کر سکتے ہیں۔ آسان رسائی اور عمدہ ٹرانسپورٹ سہولیات نے یہاں آنا جانا بے حد آسان بنا دیا ہے۔

اس سفر میں، میں نے اپنی فیملی کے ساتھ ہر لمحہ جیا، ان کے چہروں پر خوشی دیکھی اور یاس آئی لینڈ کی خوبصورتی اور جدیدیت کو دل و جان سے محسوس کیا۔ یہ جگہ واقعی متحدہ عرب امارات کی ترقی اور ثقافت کی ایک جیتی جاگتی مثال ہے۔

اگر آپ کبھی ابو ظہبی جائیں تو یاس آئی لینڈ کی سیر کو اپنی ترجیحات میں شامل کریں، کیونکہ یہ جگہ آپ کے دل کو سکون دے گی، آپ کی روح کو تازگی بخشے گی اور زندگی کی خوبصورتی کو ایک نئے رنگ میں دکھائے گی۔