Lafzon Ke Parde Mein Chupi Hikmaten
لفظوں کے پردے میں چھپی حکمتیں
اپنی ذاتی ڈائری سے کچھ انمول خزانہ آپ کی خدمت میں پیش ہے
1)
محبت ایسا نغمہ ہے
ذرا بھی جھول ہو لے میں
تو سر قائم نہیں ہوتا
محبت ایسا شعلہ ہے
ہوا جیسی بھی چلتی ہو
کبھی مدھم نہیں ہوتا
محبت ایسا رشتہ ہے
کہ جس میں بندھنے والوں کے
دلوں میں غم نہیں ہوتا
محبت ایسا پودا ہے
جو تب بھی سبز رہتا ہے
کہ جب موسم نہیں ہوتا
محبت ایسا دریا ہے
کہ بارش روٹھ بھی جاتے
تو پانی کم نہیں ہوتا
(امجد اسلام امجد)
2) میں وہ ہوں جو کہ میں سوچتا ہوں کہ میں ہوں۔
3) صبح 7 سے 12 بجے کا وقت فیصلے کرنے کے لیے بہترین ہے دوپہر 12 سے 2 کے دوران آپ بہتر فیصلہ نہیں کر پاتے۔
4) اپنی فکر اور محنت اپنے دائرہ اختیار میں کریں۔
5) اس پتھر کو ہاتھ نہ لگاؤ جیسے اٹھانا تمہارے بس میں نہ ہو۔ تیر کر اتنی دور نہ جاؤ کہ واپس آ نا مشکل ہو جائے۔
6) بادشاہ (باس، مینجر، سیٹھ)کی مثال انگور کی اس بیل کی سی ہے جو بہترین نہیں بلکہ قریبی درخت پر چڑھتی ہے۔ (باس مینجمنٹ)۔
7) دماغی سکون اور اطمینان کے لیے بینک میں مناسب رقم ضروری ہے۔
8) عقاب کو گھاس کھلانے اور گدھے کو گوشت کھلانے کی کوشش نہ کرو۔
9) بیرون ملک مقیم پاکستانی ایک ہاتھ میں دو تربوز اٹھانے کی کوشش کرتے ہیں۔
10) کوئی عقاب ایسا نہیں ہوتا جس کا آسمان نہ ہو۔
11) دروازہ توڑنے کی ضرورت نہیں۔ کنجی (ڈائیلاگ) سے بڑی آسانی سے کھل جاتا ہے۔
12) روٹی کی ضرورت کتنی ہی کیوں نہ ہو سارے دانے کبھی ختم نہیں کرنے چاہیئں۔ کسان ہمیشہ سب سے اچھے دانے بیج کے لیے محفوظ رکھتا ہے۔ (سیونگ اکاؤنٹ بنائیں )
13)
عقاب تیرا جنم کہاں ہوتا تھا
"ایک تنگ گھاٹی میں"۔
عقاب تو کہاں پرواز کر رہا ہے
"وسیع و عریض آ سمانوں میں"۔
14) جاگنا (راتوں کو جاگنا) اُس وقت خوبصورت ہوتا ہے جب تم خود اسے چُنو، مگر جب یہ تمہیں چُن لے تو یہ تکلیف دہ بن جاتا ہے۔
15)
عقاب تیرا پسندیدہ گیت کون سا ہے
"فلک بوس پہاڑیاں اور آ سمانوں کی وسعت"۔
سمندری مرغابی تو کس چیز کے بارے میں گیت گاتی ہے
"نیلے گہرے سمندر کے بارے میں"۔
پہاڑی گدھ تیرا من پسند گیت کس چیز سے متعلق ہے
"لاشوں اور مردار سے متعلق جو مجھے بے حد مرغوب ہیں"۔
آ پ کا گیت کون سا ہے؟
16) کوئی ایک دو یا تین نعمتیں لکھ لیں اور ان کے بارے میں سوچا کریں۔
17) پنجرے میں بند چڑیا ہر وقت میرا وطن، میرا وطن پکارتی رہتی تھی آ زاد کرکے چیک کیا تو خوشی خوشی اڑتی ہوئی ایک ویران سی چٹان پر جا کر بسیرا کر لیا۔ (اپنا وطن انمول ہوتا ہے)
18) کنجوسی ختم کرنی ہو تو سخیوں میں بیٹھیں۔
19) تنہائی پسند ہیں تو پارٹی والوں میں بیٹھیں۔
20) پہلی ملاقات میں مرد کا جوتا اور عورت کے بال دیکھے جاتے ہیں۔
21) اگر تم وہی کچھ کرتے رہو گے جو ہمیشہ سے کرتے آ رہے ہو تو تمہیں وہی کچھ ملے گا جو اب تک ملتا رہا ہے۔ (کمفرٹ زون سے باہر نکلیں)۔
22)
جس پیڑ کے سائے میں تھکن دور ہو میری
سوکھا ہی سہی وہ مجھے درکار وہی ہے
23)
فارسی کا مشہور شعر ہے:
آنچہ شیراں را کند روبہ مزاج
احتیاج است، احتیاج است احتیاج
ضرورت اور حاجت مندی شیروں کو بھی لومڑی بنا دیتی ہے۔
24) امریکہ میں کی گئی ایک تحقیق کے مطابق جب انسان قہقہہ لگاتا ہے تو وہ جب سب پہلے جس چیز پر نظر کرتا ہے وہ اس کی پسندیدہ ہوتی ہے۔
25) میں اپنی زندگی کے سبق سے یہی سمجھا ہوں کہ آپ دوسروں کو خود سے وابستہ رکھنا چاہتے ہیں تو ان پر احسان کریں، ان کی مدد کریں، مشکل وقت میں ان کا ساتھ دیں یا پھر آپ اتنی اچھی گفتگو کر سکتے ہوں کہ لوگ آپ سے بار بار ملنا چاہیں۔ (رؤف کلاسرا)
