PHD, Har Qadam Aik Mushkil Project

پی ایچ ڈی، ہر قدم پر ایک مشکل پراجیکٹ

پی ایچ ڈی کو اگر ایک جملے میں بیان کیا جائے تو کہا جا سکتا ہے کہ یہ ایک ڈگری نہیں بلکہ مشکل منصوبوں کی طویل زنجیر ہے۔ یہ سفر داخلے سے شروع ہو کر دفاع پر ختم نہیں ہوتا، بلکہ ہر مرحلہ خود ایک الگ پراجیکٹ بن کر سامنے آتا ہے۔ ایسا پراجیکٹ جس میں وقت، ذہن، اعصاب اور حوصلہ سب کچھ شامل ہوتا ہے۔

یہ حقیقت اکثر نظر انداز کر دی جاتی ہے کہ پی ایچ ڈی میں پہلا مشکل مرحلہ داخلہ ہے۔ مضبوط ریسرچ پروپوزل تیار کرنا، واضح مسئلہ تحقیق متعین کرنا، سپروائزر کی دستیابی، میرٹ اور انٹرویو، یہ سب کسی ابتدائی امتحان سے کم نہیں۔ داخلہ مل جانا اس بات کی دلیل ہوتا ہے کہ امیدوار نے پہلا مشکل پراجیکٹ کامیابی سے مکمل کر لیا۔

"Great journeys begin with difficult first steps. "

داخلے کے بعد دوسرا بڑا پراجیکٹ موضوع کی بقا (survival of topic) ہوتا ہے۔ کئی طالب علموں کا منتخب کردہ موضوع وقت، ڈیٹا یا وسائل کی کمی کے باعث خطرے میں پڑ جاتا ہے۔ کبھی موضوع محدود کرنا پڑتا ہے، کبھی پوری سمت بدلنی پڑتی ہے۔ یہ وہ مرحلہ ہے جہاں تحقیق کا خواب پہلی بار حقیقت کی دیوار سے ٹکراتا ہے۔

اس کے بعد لٹریچر ریویو ایک مکمل پراجیکٹ کی صورت اختیار کر لیتا ہے۔ سینکڑوں مقالے، کتابیں اور نظریات اور ہر ایک سے اپنا کام مختلف ثابت کرنا۔ یہ مرحلہ ذہنی طور پر سب سے زیادہ تھکا دینے والا ہوتا ہے، کیونکہ یہاں علم کا بوجھ بھی ہوتا ہے اور اپنی انفرادیت ثابت کرنے کا دباؤ بھی۔

"Higher education doesnt make life easier, it makes thinking deeper. "

پھر آتا ہے ریسرچ میتھڈالوجی کا مرحلہ، جہاں ایک غلط انتخاب پورے پراجیکٹ کو خطرے میں ڈال سکتا ہے۔ ڈیٹا جمع کرنے کے طریقے، نمونہ (sample)، اوزار (tools) اور اخلاقی اجازتیں، یہ سب کسی عملی منصوبے سے کم نہیں۔ اکثر یہاں تاخیر، فیلڈ میں رکاوٹیں اور ادارہ جاتی مسائل سامنے آتے ہیں۔

ڈیٹا اکٹھا کرنے کے بعد ایک نیا مشکل پراجیکٹ شروع ہوتا ہے: ڈیٹا کا تجزیہ۔ نمبرز ہوں یا متن، ہر صورت میں تجزیہ مہارت، صبر اور بار بار نظرثانی مانگتا ہے۔ کئی بار حاصل شدہ نتائج توقعات کے خلاف ہوتے ہیں اور محقق کو مایوسی کے باوجود سچ کا ساتھ دینا پڑتا ہے۔

Research is to see what everybody else has seen, and to think what nobody else has thought. Albert Szent-Györgyi

تحریر کا مرحلہ بظاہر آخری لگتا ہے، مگر درحقیقت یہ سب سے سخت پراجیکٹ ہوتا ہے۔ ایک ایک جملہ، ایک ایک حوالہ اور ہر دعوے کے پیچھے ثبوت، یہ سب ذہنی دباؤ کو کئی گنا بڑھا دیتا ہے۔ سپروائزر کی اصلاحات، کمیٹی کے سوالات اور بار بار ترمیم، یہ سب تحریر کو نکھارتے ضرور ہیں مگر محقق کو اندر سے آزما بھی لیتے ہیں۔

آخر میں دفاع (Viva) ایک الگ پراجیکٹ کے طور پر سامنے آتا ہے۔ یہاں صرف مقالہ نہیں پرکھا جاتا بلکہ محقق کی سوچ، اعتماد اور فکری پختگی بھی جانچی جاتی ہے۔ چند گھنٹوں کا یہ مرحلہ دراصل کئی برسوں کی محنت کا خلاصہ ہوتا ہے۔

"The more I learn, the more I realize how much I dont know. "

پی ایچ ڈی کی اصل کامیابی دفاع کے بعد بھی ختم نہیں ہوتی۔ مقالے کی اشاعت، تنقید کا سامنا اور علمی برادری میں جگہ بنانا، یہ سب اگلے مشکل پراجیکٹس ہیں۔ یوں پی ایچ ڈی انسان کو سکھاتی ہے کہ علم کا راستہ کبھی ہموار نہیں ہوتا۔

آخرکار، پی ایچ ڈی ہر قدم پر ایک مشکل پراجیکٹ ضرور ہے، مگر یہی مشکلات محقق کو مضبوط، ذمہ دار اور باوقار بناتی ہیں۔ یہ سفر اُن لوگوں کے لیے ہے جو آسانیوں کے بجائے معنی کو ترجیح دیتے ہیں۔

"Education is not the filling of a pail, but the lighting of a fire. "

پی ایچ ڈی کا حاصل یہی ہے کہ انسان کے اندر علم کی وہ آگ روشن ہو جائے جو مشکل منصوبوں سے گزر کر ہی جلتی ہے۔