Thalavan

تھلاون

آج میں نے اپنی فلموں کی فہرست میں سے فلم "تھلاون" کا انتخاب کیا اور ابھی ختم کرکے فارغ ہوا ہوں۔ مجھے فلم نے بہت مزہ دیا اور ایک لمحے کے لیے بھی تجسس میں کوئی کمی نہیں آنے دی بلکہ دلچسپی میں اضافہ ہی ہوا۔ آئیے اس فلم پر اپنے خیالات کا اظہار کرتے ہیں۔

فلم "Thalavan" ایک عام کرائم تھرلر نہیں ہے، بلکہ یہ انسانی رشتوں، انا کی جنگ اور سچائی کی تلاش کی ایک ایسی داستان ہے جو آپ کو آہستہ آہستہ اپنی گرفت میں لے لیتی ہے۔ کہانی کا آغاز سادہ سا دکھائی دیتا ہے مگر جیسے جیسے پردہ اٹھتا ہے، ایک معمولی سا واقعہ ایک بھاری بھرکم راز کی شکل اختیار کر لیتا ہے۔ ایک ریٹائرڈ پولیس آفیسر اپنے پرانے واقعات بیان کرتا ہے اور انہیں بیانات کے درمیان اچانک ایک ایسا کیس ابھرتا ہے جو وقت کے دھندلکوں میں دب گیا تھا، لیکن آج بھی اپنی شدت کے ساتھ زندہ ہے۔

دو پولیس آفیسرز کہانی کے مرکز میں ہیں۔ ایک طرف جے شنکر ہے، جو تجربہ کار اور اپنی شخصیت میں وقار اور سکون کی جھلک رکھتا ہے اور دوسری طرف کارتک ہے، جو جوان ہے، جذباتی ہے اور اپنی جگہ بنانے کی تگ و دو میں مصروف ہے۔ دونوں کے بیچ کی کشمکش صرف ایک مقدمے تک محدود نہیں رہتی، بلکہ یہ ان کے باطن کی لڑائی ہے۔ جب جے شینکرکے گھر ایک لاش برآمد ہوتی ہے تو یہ کشمکش اور بھی سنگین ہو جاتی ہے۔ اب نہ صرف کیس پیچیدہ ہو جاتا ہے بلکہ دونوں آفیسرز ایک دوسرے پر بھی شک کرنے لگتے ہیں۔ یہی شک اور انا کہانی کو اس کے اصل رنگ میں ڈھال دیتے ہیں۔

فلم کی سب سے بڑی خوبی اس کی فضا ہے۔ اندھیروں اور روشنیوں کا کھیل، بند کمروں کی خاموشی، بارش کے بوندوں کی گونج اور پس منظر میں بجتی ہوئی دبی دبی موسیقی ایک ایسا ماحول تخلیق کرتی ہے جو آپ کو بے چین کیے رکھتا ہے۔ ہر منظر اس احساس کو بڑھاتا ہے کہ کہیں نہ کہیں کوئی سچائی چھپی ہوئی ہے، جو ابھی ظاہر نہیں ہوئی۔ یہی کیفیت فلم کو ایک مستقل تناؤ میں رکھتی ہے۔

کہانی کے ہر حصے میں جاذبیت اور تجسس غالب رہتا ہے۔ ہر موڑ پر یہ لگتا ہے کہ اب راز کھلے گا مگر اگلا موڑ ناظرین کو مزید الجھا دیتا ہے۔ یہ الجھن ہی اس فلم کی اصل کشش ہے۔

اختتام پر جب سب راز کھلتے ہیں تو کئی سوالوں کے جواب مل جاتے ہیں، لیکن کچھ سوال جان بوجھ کر چھوڑ دیے جاتے ہیں۔ یہی ادھورا پن فلم کو مکمل ہونے کے باوجود ناتمام سا بناتا ہے۔ دیکھنے والا سوچتا رہتا ہے کہ حقیقت آخر کہاں تک کھلی؟ اور کہاں جا کر دوبارہ بند ہوگی؟ یہ سوچنا ہی فلم کا اصل کمال ہے، کیونکہ اس کی گرفت پردے پر ختم نہیں ہوتی بلکہ ذہن میں چلتی رہتی ہے۔

بہرحال یہ فلم اپنی کمزوریوں کے باوجود ایک بہترین اور مضبوط فلم ہے۔ یہ صرف ایک قتل کی گتھی نہیں بلکہ انسان کی انا، وقار اور سچائی کے درمیان مسلسل کشمکش کی عکاسی ہے۔ یہ فلم دکھاتی ہے کہ جرم ہمیشہ بندوق یا چھری سے نہیں ہوتا، کبھی کبھی یہ انسان کے دل میں چھپے ہوئے غرور سے بھی جنم لے لیتا ہے اور شاید اسی لیے یہ کہانی اتنی جاندار ہے کہ ختم ہونے کے بعد بھی ذہن کے کسی کونے میں زندہ رہتی ہے۔