Kitab Tehzebon Ki Maa: The Prince (2)

کتاب تہذیبوں کی ماں: دی پرنس (2)

انسانی تاریخ میں کچھ کتابیں ایسی ہوتی ہیں جو صرف پڑھنے والوں کو متاثر نہیں کرتیں بلکہ پوری دنیا کی سیاست، طاقت کے مفہوم، اقتدار کے طریقہ کار اور حکمرانی کے رویے کو ایک نئی سوچ عطا کرتی ہیں۔ نکولو میکاولی کی تصنیف دی پرنس (The Prince) بھی ایسی ہی ایک کتاب ہے، جس نے پانچ صدیوں سے زیادہ عرصہ گزر جانے کے باوجود دنیا بھر کے سیاسی رہنماؤں، فوجی حکمت کاروں، بادشاہوں، انقلابیوں، آمروں اور دانشوروں کے ذہنوں کو جھنجھوڑ رکھا ہے۔ یہ کتاب محض ایک بادشاہ کے لیے مشوروں کا مجموعہ نہیں، بلکہ ایک سیاسی آئینہ ہے، جس میں اقتدار کی ننگی سچائی پوری بےرحمی، حقیقت پسندی اور چالاکی کے ساتھ جھلکتی ہے اور یہی چیز اسے اس قدر متنازع، مقبول اور دلکش بناتی ہے۔

نکولو میکاولی اٹلی کے شہر فلورنس میں پندرہویں صدی کے اختتام پر پیدا ہوا۔ وہ ایک سرکاری ملازم، سفارت کار اور فوجی مبصر رہا۔ اس نے زمانے کے بدلتے رنگ، تخت و تاج کی آنکھ مچولیاں، دھوکہ، سازش، جنگ اور معاہدوں کی نازک پرتیں اپنی آنکھوں سے دیکھیں۔ جب فلورنس میں میڈیچی خاندان نے اقتدار پر دوبارہ قبضہ کیا تو میکاولی کی نوکری ختم کر دی گئی اور وہ عملی سیاست سے دور ہوگیا۔ مگر اس نے خاموشی سے جو کتاب لکھی، وہ ایک سیاسی دھماکے سے کم نہ تھی۔ یہی "دی پرنس" تھی، ایک ایسی کتاب جو بظاہر میڈیچی خاندان کے شہزادے کے لیے لکھی گئی تھی، مگر حقیقتاً یہ اقتدار کے کھیل کا وہ خفیہ نسخہ ہے جسے ہر اقتدار پرست نے کسی نہ کسی لمحے ضرور کھولا۔

دی پرنس کا مرکزی نکتہ یہ ہے کہ "اقتدار حاصل کرنا اور اسے قائم رکھنا" ایک فن ہے اور یہ فن اخلاقیات سے زیادہ حقیقت پسندی، چالاکی اور قوتِ فیصلہ سے سیکھا جاتا ہے۔ میکاولی کے نزدیک ایک بادشاہ یا حکمران کو ہر وقت اس بات پر نظر رکھنی چاہیے کہ طاقت کیسے حاصل کی جائے، دشمن کیسے قابو میں رکھا جائے، عوام کو کیسے سنبھالا جائے اور ریاست کو کیسے محفوظ رکھا جائے۔ وہ مذہب، اخلاق، رحم، یا روایتی اخلاقیات کو ایک حکمران کی کامیابی کے لیے ثانوی حیثیت دیتا ہے۔ بلکہ وہ کہتا ہے کہ اگر حکمران کو جھوٹ بولنا پڑے، دھوکہ دینا پڑے، وعدہ خلافی کرنی پڑے یا اپنے مفاد کے لیے ظلم بھی کرنا پڑے، تو یہ سب کچھ ریاست کے مفاد میں جائز ہے، بشرطیکہ یہ سب مہارت سے کیا جائے۔

یہی بات اسے دنیا بھر میں سب سے زیادہ "عملیت پسند فلسفی" کا درجہ دیتی ہے۔ وہ نظریاتی یا خیالی دنیا میں رہنے کے بجائے، انسان کو جیسا ہے، ویسا مانتا ہے، مفاد پرست، خود غرض، طاقت پسند اور جلد فریب کھانے والا۔ میکاولی بار بار کہتا ہے کہ عوام کی یادداشت کمزور ہوتی ہے، ان کے جذبات آسانی سے قابو میں آ جاتے ہیں اور وہ صرف نتائج دیکھتے ہیں، نیت نہیں۔ اس لیے ایک کامیاب حکمران وہی ہے جو دکھاوے میں رحم دل ہو، مگر موقع پرست اور ایسا لگے کہ وہ انصاف پسند ہے، چاہے اس کے فیصلوں کی بنیاد سراسر مصلحت پر ہو۔

میکاولی کا مشورہ ہے کہ حکمران کو بیک وقت شیر اور لومڑی جیسا ہونا چاہیے۔ شیر دشمنوں سے لڑنے کی طاقت رکھتا ہے اور لومڑی جال پہچاننے کی عقل رکھتی ہے۔ صرف طاقت سے کامیابی ممکن نہیں اور صرف چالاکی سے دشمن دبائے نہیں جا سکتے۔ ان دونوں کا امتزاج ہی وہ فارمولہ ہے جس سے اقتدار کا ستون مضبوط ہوتا ہے۔ یہ باتیں آج کے جدید سیاستدانوں، کاروباری رہنماؤں اور حکومتی عہدیداروں کے لیے بھی اتنی ہی کارآمد ہیں جتنی پندرھویں صدی کے اٹلی کے شہزادوں کے لیے تھیں۔

دی پرنس ایک اور جملے کی وجہ سے بھی بہت مشہور ہوئی: "The end justifies the means" یعنی "مقصد اگر اچھا ہو تو ذریعہ کیسا بھی ہو، وہ درست ہے"۔ اگرچہ یہ جملہ لفظ بہ لفظ کتاب میں نہیں ملتا، لیکن پوری کتاب کا خلاصہ یہی ہے۔ میکاولی یہ سمجھاتا ہے کہ اگر حکمران کی نیت ریاست کو بچانا، عوام کو تحفظ دینا، یا دشمن کو روکنا ہے، تو اس کے لیے اختیار کیا گیا طریقہ چاہے جیسا بھی ہو، وہ معقول ہے۔ چاہے وہ طریقہ اخلاقی اصولوں سے متصادم ہی کیوں نہ ہو۔ یہ نقطۂ نظر مذہبی، فلسفیانہ یا انسانی اخلاقیات سے مختلف ہے، بلکہ بعض اوقات اس کا تضاد بھی ہے اور اسی لیے دی پرنس کو کبھی کبھی "شیطانی کتاب" یا "ظالموں کا دستور" بھی کہا گیا۔ مگر حقیقت یہ ہے کہ یہ کتاب ہمیں وہ دکھاتی ہے جو دنیا واقعی ہے، نہ کہ وہ جو ہمیں دکھائی جاتی ہے۔

دی پرنس میں ایک اور دلچسپ بات یہ ہے کہ میکاولی نے مستقل اقتدار پر زور نہیں دیا، بلکہ اس نے اقتدار کی فطرت کو ناپائیدار قرار دیا ہے۔ وہ کہتا ہے کہ بادشاہت یا سلطنت ہمیشہ غیر یقینی ہوتی ہے اور حکمران کو ہر وقت تیار رہنا چاہیے کہ حالات پلٹ سکتے ہیں۔ اسی لیے وہ مشورہ دیتا ہے کہ طاقت کو جلد سے جلد مضبوط کیا جائے، دشمنوں کو ابتدائی مرحلے میں ختم کیا جائے اور وفاداری محض جذبات پر نہیں بلکہ مفاد پر قائم کی جائے۔ اس کی زبان واضح، ننگی اور تلخ ہے اور یہی اسے اتنا سچا بناتی ہے۔

یہ کتاب اس وقت لکھی گئی جب یورپ زبردست سیاسی انتشار سے گزر رہا تھا۔ پاپائے روم، فرانس، اسپین اور دوسرے یورپی طاقتور خاندانوں کی آپسی سازشیں، جنگیں اور بغاوتیں میکاولی کی آنکھوں کے سامنے تھیں۔ فلورنس اور اطالوی ریاستیں بار بار زوال، فتح، پھر زوال کا شکار ہو رہی تھیں۔ میکاولی نے ان تمام تجربات کو سمیٹ کر ایک ایسا "سیاسی ہتھیار" لکھا جس کا مقصد کسی ایک شہزادے کو طاقت دینا نہیں بلکہ حکمرانی کا پورا فن سکھانا تھا۔

آج اگر ہم دنیا کی بڑی سیاسی شخصیات کو دیکھیں، چاہے وہ تاریخی ہوں یا موجودہ، خواہ وہ جمہوری نظام سے آئے ہوں یا آمرانہ راستوں سے، ہم دی پرنس کی جھلک ان کے انداز میں ضرور دیکھتے ہیں۔ کسی نے میڈیا کو استعمال کرکے عوامی محبت حاصل کی، کسی نے دشمنی کو موقع بنا کر اقتدار سمیٹا، کسی نے منافقت کو ہنر بنایا اور کسی نے رحم دلی کا لبادہ اوڑھ کر سخت فیصلے کیے۔ یہ سب دی پرنس کے صفحوں میں پہلے سے لکھا ہوا ہے۔

اس کتاب کی ایک اور خصوصیت اس کی سادگی ہے۔ فلسفہ ہو یا سیاست، اکثر ایسی کتابیں خشک، مشکل اور ادق زبان میں لکھی جاتی ہیں، مگر دی پرنس نہایت رواں، سیدھی اور کہانی جیسی روانی رکھتی ہے۔ میکاولی تاریخ سے مثالیں دیتا ہے، اٹلی کے موجودہ حالات کی وضاحت کرتا ہے اور عملی مشورے دیتا ہے جیسے کوئی استاد اپنے شاگرد کو راز کی بات بتا رہا ہو۔ یہی انداز قاری کو کتاب سے جوڑتا ہے، چاہے وہ ایک عام طالب علم ہو یا کسی ملک کا صدر۔

دی پرنس کو یورپ میں پہلے پہل ممنوع قرار دیا گیا، اسے بائبل مخالف اور شیطانی کہا گیا۔ لیکن وقت کے ساتھ ساتھ دنیا نے جان لیا کہ یہ کتاب کسی مذہب یا اخلاق کے خلاف نہیں بلکہ انسانی فطرت اور اقتدار کی حقیقت پر مبنی ہے۔ آج اسے سیاسیات کے شعبے میں بنیادی کتابوں میں شمار کیا جاتا ہے۔ کچھ لوگ اسے خطرناک کہتے ہیں، کچھ اسے ناقابلِ نظر انداز سچائی۔ لیکن کوئی بھی اس کی اہمیت سے انکار نہیں کر سکتا۔

اس کتاب کو اگر چانکیہ کی ارتھ شاستر کے ساتھ رکھا جائے تو دلچسپ مشابہتیں سامنے آتی ہیں۔ دونوں کتابیں اقتدار کو اخلاق سے جدا کرکے دیکھتی ہیں۔ دونوں میں حکمران کو چالاک، زیرک اور حقیقت پسند ہونا سکھایا جاتا ہے۔ دونوں دشمنوں سے نمٹنے کے لیے حکمتِ عملی، خفیہ نظام اور سیاسی سازشوں کو جائز قرار دیتی ہیں، بشرطیکہ مقصد ریاست کی بقا ہو۔ فرق یہ ہے کہ ارتھ شاستر مذہب کو ایک نظام کے طور پر استعمال کرنے کی بات کرتی ہے، جب کہ دی پرنس مذہب کو صرف ایک "تصویر" کے طور پر برتنے کا مشورہ دیتی ہے، یعنی لوگ جسے دیکھ کر مطمئن ہو جائیں۔

آج کے دور میں جب دنیا ایک بار پھر انتشار، داخلی خلفشار اور بین الاقوامی چالاکیوں کا شکار ہے، تو دی پرنس ہمیں یاد دلاتی ہے کہ اقتدار حاصل کرنا جتنا مشکل ہے، اسے سنبھالنا اس سے کہیں زیادہ نازک کھیل ہے۔ حکمرانوں کو ہر وقت جاننا چاہیے کہ کس لمحے کون سا چہرہ پہننا ہے، کب رحم کرنا ہے، کب طاقت دکھانی ہے اور کب خاموشی سے حملہ کرنا ہے۔ کیونکہ بقول میکاولی، "اگر تم طاقتور ہو تو لوگ تمہیں بخش دیں گے، چاہے تم کتنے ہی بے رحم کیوں نہ ہو۔ لیکن اگر تم کمزور ہو، تو تمہاری نیکی بھی تمہیں نہیں بچا سکے گی"۔