Mera Ghar Da Safar

میرا گھر دا سفر

ڈاکٹر ترنجیت سنگھ بوتالیہ امریکہ وچ قائم بین المذاہب کارکن تے سکالر نیں۔ اوہ ایس سمے امریکہ دے مذہب برائے امن (ریلیجن فار پیس) دے ایگزیکٹو ڈائریکٹر دے طور تے کم کر رہے نیں۔ اے کتاب اونھاں دے گھر (پاکستان دے شہر گوجرانوالہ دے نیہڑے بٹالہ پنڈ) دا سفر اے جیہڑا اونہاں دے دادکے 47 دے اجاڑے اچ چھڈ آئے سن۔

اے کتاب پڑھدیاں مینوں عجیب طرح دی خوشی ہوندی رہی او اس وجہ توں کہ ہک تے میں تریخ دا طالب علم ہاں تے دوجا بوتالیہ ہوراں دا تاریخ تے گوڑا عبور، مطلب اونہاں نے اپنا سفر پاکپتن توں شروع کیتا جتھے اونہوں دے وڈکے کوئی 750 ورھیاں پہلاں بابا فرید لئی لنگر ورتاندے سن۔ اوس تو بعد اونہاں نے پنجاب اچ ڈھیر گردوارے ویکھے جنہاں وچوں ہر ایک نال پوری پوری تریخ جڑی ہوئی سی جیہڑی بوتالیہ صاحب اپنے موہنے انداز اچ سانوں نال نال دسدے گئے۔ لہور دا قلعہ ویکھدیاں اونہوں نے دسیا کہ کس طرح اج توں 200 ورہیاں پہلاں اونہاں دے وڈکیاں نے مہاراجہ رنجیت سنگھ ہوراں دے فوج اچ سیوا کیتی۔ اوس تو بعد اندرون لہور دی گلیاں اچ اونہاں نے اپنے جدی نانکے گھر دی کھوج کیتی (جدے اچ او کامیاب رہے)۔ اخیر تے اپنے دادکے پنڈ بٹالہ (رنجیت سنگھ دے زمانے اچ انہاں دے وڈکے منے پرمنے سردار ہوندے سن جنہاں نو اس ویلے بتالی جاگیراں ملیاں سن، پنجابی اچ 42 نو بتالی آکھیا جاندا اے جس دی وجہ تو انہا دے پنڈ تے خاندان دا ناں بتالیہ تے بٹالہ پے گیا، جدا ثبوت برطانوی لائیبریری دی آرکائیوز اچ موجود اے) اپڑ گئے تے اوس حویلی جا پہنچے جتھوں انہاں دےدادا تے دادی اپنے بچیاں نال سن 47 اچ نکلے سن

اے کتاب پڑھدیاں مینو احساس ہویا کہ ساڈے پنجاب اچ سکھاں دی کنی کو تریخ وکھری پئی اے تے ہر ہر تریخ نال اک وکھ ای کہانی اے۔ اے پڑھ کر بہت خوشی ہوئی کہ تریخ دے بہت سارے حوالے اج وی اپنی اصل حالت اچ موجود نیں (سردار ہوراں دی حویلی دے باہر بنے مور نے اونہاں نو اس حویلی دا راہ دسیا جیہڑا 72 ورہیاں توں انج دا انج ای موجود اے)

سردار صاحب اپنی زندگی اچ او کم کر گئے جو کرن دا میں صرف سفنا ای ویکھ سکدا ہاں