Jamea Baltistan Ka Sports Gala 2025
جامعہ بلتستان کا سپورٹس گالا 2025
جب برفیلے پہاڑوں کی چوٹیاں سورج کی آخری کرنوں کو گلے لگاتی ہیں اور بلتستان کی وادیوں میں ہوائیں اپنی خاموش سرگوشیاں بکھیرتی ہیں، تو ایک ایسی دھڑکن اٹھتی ہے جو پتھروں کو بھی پگھلا دیتی ہے۔ یہ دھڑکن تھی جامعہ بلتستان کے سپورٹس گالا 2025 کی، جو گزشتہ روز اپنے اختتام پر آنسوؤں، ہنسی اور فتح کے نعروں کے ساتھ رخصت ہوا۔ یہ گالا کوئی عام کھیلوں کا میلہ نہ تھا، بلکہ بلتستان کے جوان دلوں کی جذبات سے بھری آواز تھا۔ جب آخری وِسل بجی، تو کھیل کا میدان محض انعامات سے نہیں، بلکہ چمکتی آنکھوں، ایک دوسرے کو گلے لگاتی بازوؤں اور جذباتی لمحوں سے جگمگا اٹھا۔ یہ تھا جامعہ بلتستان کے طلبہ کا جوش، اس کی روح اور وہ آگ جو برف میں بھی جلتی ہے۔
جامعہ بلتستان کا سپورٹس گالا، جو 20 اکتوبر کو ایک پرجوش افتتاح کے ساتھ شروع ہوا، چھ دن تک جامعہ کے اسٹیڈیم میں سمندر کی طرح لہراتا رہا۔ یہ گالا طلبہ کے عزائم کا عکاس تھا، جو کھیلوں کے میدان میں اپنے خوابوں کے پر لگا کر اڑے۔ فٹ بال، والی بال، کرکٹ، بیڈمنٹن، رسہ کشی اور ریس کے زبردست مقابلوں میں مختلف شعبوں سے تعلق رکھنے والی ٹیمیں، جیسے کہ لینگویج اینڈ کلچرل اسٹڈیز، کمپیوٹر سائنس، انوائرنمنٹل سائنسز، کیمسٹری، زولوجی، بوٹنی، کامرس اینڈ بزنس مینجمنٹ، ٹورازم، آرکیالوجی، ایکنومکس اور میتھمیٹکس کی ٹیمیں ایک دوسرے کے مدمقابل میدان میں اتریں۔ لیکن یہ مقابلہ محض جیت و ہار کا نہیں تھا، بلکہ ایک دوسرے کے ساتھ جڑنے، ہاتھ ملانے اور خواب بانٹنے کا ایک موقع تھا۔
جذبات کا عالم یہ تھا کہ کھلاڑی ایک دوسرے کو اٹھا کر پھینکتے اور تماشائیوں کی تالیاں اور ہنسی پہاڑوں سے ٹکرا کر واپس لوٹتی تھی۔ یہ وہ جذبات تھے جن سے جامعہ بلتستان کا دل دھڑک رہا تھا۔
یہ گالا صرف کھیلوں کا جشن ہی نہیں تھا، بلکہ ایک جذباتی سفر تھا۔ بلتستان، جہاں اعلیٰ تعلیم اب بھی بہت سے بچوں کے لیے ایک خواب ہے اور لڑکیوں کے لیے تو یہ خواب ایک چیلنج کی مانند ہے، وہاں یہ گالا ایک خاموش انقلاب بن گیا۔ 60 فیصد سے زائد شرکاء لڑکیاں تھیں، جو اس بات کا عہد تھا کہ بلتستان کی لڑکیاں اب کسی بھی میدان میں پیچھے نہیں رہیں گی۔
اس گالا کی ایک منفرد بات اس کا ماحولیاتی شعور تھا۔ جامعہ بلتستان کے انوائرنمنٹل سائنسز اور ٹورازم پروگرام کے طلبہ نے ہر میچ کے درمیان "گرین بریکس" کا اہتمام کیا، جہاں پلاسٹک کے استعمال سے ہونے والے نقصانات، مقامی جھیلوں کی حفاظت اور جامعہ کو صاف رکھنے کی مہم پر زور دیا گیا۔
سپورٹس گالا کی اختتامی تقریب کے مہمان خصوصی گورنر سید مہدی شاہ تھے، جنہوں نے خصوصی طور پر شرکت کرکے طلبہ کی بھرپور حوصلہ افزائی کی۔ وائس چانسلر پروفیسر ڈاکٹر عبدالمتین نے گالا کے کامیاب انعقاد پر تمام معاون عملے کا شکریہ ادا کیا اور آخر میں تمام فاتح ٹیموں اور شاندار انتظامات پر عملے کو انعامات اور شیلڈز سے نوازا۔۔
